O Arquivo da Emigración Galega, como centro documental e de referencia informativa, posúe unha biblioteca especializada en temas migratorios composta por monografías e publicacións periódicas de carácter científico. Este fondo bibliográfico intégrase na Biblioteca do Consello da Cultura Galega e, como fondo de especial interese para Galicia, na Rede de Bibliotecas de Galicia, o que permitirá o seu posterior acceso mediante un catálogo automatizado.

• Referencia: inclúe dicionarios, catálogos, bibliografías e obras monográficas sobre historia, socioloxía, antropoloxía, economía, etc.


• Demografía: agrupa manuais relativos á xeografía humana e estudos sobre a poboación e os movementos demográficos.


• Emigración: constitúe a parte fundamental da colección e comprende monografías específicas sobre os movementos migratorios. Está dividida en diferentes apartados segundo a singularidade xeográfica das migracións: América Latina, América do Norte, Europa, Oceanía, España e Galicia.


• Exilio: está composta por todo tipo de obras que estudan a problemática dos emigrados políticos desde unha perspectiva individual ou colectiva.


• Inmigración: agrupa, primordialmente, informes e estudos da inmigración en Europa e España, o multiculturalismo e estudos de lexislación sobre esta temática.


• Literatura: recompila os estudos e obras literarias referidas, directa ou indirectamente, ao mundo da emigración, exilio e inmigración.


No fondo de publicacións periódicas inclúense revistas científicas de carácter nacional e internacional que abordan o estudo dos procesos migratorios, a demografía, o multiculturalismo, a historia, etc.