Centro de Documentación Sociolingüística de Galicia (CCG)
Cidade da Cultura de Galicia
Biblioteca de Galicia, 1º andar
Monte Gaiás, s/n
15707 Santiago de Compostela
cdsg@consellodacultura.gal
Tel: +34 881 995 146 | +34 881 995 142
Noticias

CDSG / NOTICIAS. 1 a 20 de 3786
17/09/2021
Outes promove o uso do galego no comercio local
O Servizo de Normalización Lingüística (SNL) do Concello de Outes está a desenvolver a campaña "en Outes, en galego!", co dobre obxectivo de promover a lingua galega como marca de calidade e darlle visibilidade ao tecido comercial e hostaleiro do municipio. No marco desta iniciativa distribuiranse entre os comerciantes e a súa clientela diferentes materiais, como folletos explicativos, bolsas de tea e adhesivos co lema da campaña. Así mesmo, o SNL municipal ofrecerá un servizo de asesoramento gratuíto a todos os negocios que o demanden. Para ampliar esta información, preme aquí.
16/09/2021
Bota a andar no campus de Pontevedra o programa Falamos
A Área de Normalización Lingüística da Universidade de Vigo e mais o Servizo de Normalización Lingüística do Concello de Pontevedra presentan a segunda edición do programa Falamos, que nesta ocasión se desenvolverá na modalidade presencial. A iniciativa está deseñada para crear novos espazos de uso para o galego no campus de Pontevedra, e o alumnado pode inscribirse en calquera das seguintes actividades: club de lectura, club de cociña, teatro e voluntariado lingüístico. Podes ampliar información premendo aquí.
16/09/2021
Comeza unha nova edición do certame #TEDSaúde
As comisións de normalización lingüística das facultades de Ciencias, Enfermaría, Farmacia, Medicina e Odontoloxía, Óptica, Psicoloxía e Veterinaria da USC, co apoio do Servizo de Normalización Lingüística, convocan o VI Concurso de subtitulación de vídeos TED de ciencias da saúde ao galego. O obxectivo é contribuír á creación de contidos divulgativos en galego sobre ciencias da saúde. O certame inclúe dúas modalidades, unha dirixida a membros da comunidade universitaria da USC que non pertenzan á comunidade TED (modalidade A) e outra destinada a membros da comunidade TED (modalidade B). Ata o vindeiro 15 de novembro, os participantes deben realizar a tradución ao galego e a subtitulación dun vídeo TED da área de saúde segundo as instrucións que se lles fornecerán. Repartirase un único premio (de 300 euros) entre os participantes alleos á USC, e outros catro premios (de 300, 250, 200 e 150 euros) entre os membros da comunidade universitaria.
14/09/2021
Bolsa de formación no SNL do Concello de Ames
O Concello de Ames convoca unha bolsa para realizar prácticas no seu Servizo de Normalización Lingüística. Poden presentarse todas aquelas persoas que teñan o título de grao en Lingua e Literatura Galegas, posúan coñecementos sobre o manexo de procesadores de texto e teñan o carné de conducir. A duración da bolsa será dun ano. O prazo para presentar as solicitudes remata o 24 de setembro, ás 14:00 horas. Para ampliar información, preme aquí.
14/09/2021
Probas para a obtención dos certificado Celga
A Secretaría Xeral de Política Lingüística da Xunta de Galicia convoca probas para a obtención dos certificados de lingua galega (niveis Celga 2, 3 e 4). As probas realizaranse en Santiago de Compostela e en Ponferrada. As sedes e os horarios definitivos publicaranse na páxina web da SXPL. O prazo de presentación de solicitudes é de 15 días hábiles, contados a partir do día seguinte ao da publicación desta convocatoria.
09/09/2021
O Concello do Grove presenta un programa de fomento do galego entre a mocidade
O Servizo de Normalización Lingüística do Concello do Grove está a organizar o programa "Bicos con lingua. Unidade didáctica", que se desenvolverá durante os meses de setembro e outubro de 2021 e que ten como obxectivo dinamizar o uso da lingua galega entre a mocidade. O programa inclúe diferentes accións de carácter lúdico e didáctico, como a presentación da obra "Bicos con lingua" (de Talía Teatro), a difusión dunha unidade didáctica sobre esta mesma obra teatral entre o profesorado de Lingua Galega dos institutos de secundaria do concello, a organización dun certame de TikTok para poñer en valor a variedade dialectal falada no Grove, ou a impartición entre o alumnado da ESO da charla "Xeliña fala galego. Un modelo de escritora monolingüe", a cargo da profesora Patricia Arias Chachero. Para ampliar información, preme aquí.
09/09/2021
Obradoiro de podcast en galego na USC
A Comisión de Normalización Lingüística da Facultade de Ciencias da Comunicación da USC organiza un obradoiro de podcast, dirixido a toda a comunidade universitaria e deseñado para fomentar a creación de contidos dixitais no noso idioma. O curso, de 15 horas de duración, será impartido por Ana González Liste, Cibrán Tenreiro, Duarte Romero e Miguel Rodríguez, coñecidos creadores de contidos dixitais en galego. As sesións terán lugar os días 27 e 30 de setembro; e 4, 7 e 14 de outubro de 2021. O prazo de inscrición remata o vindeiro 22 de setembro. Podes ampliar información sobre os contidos e os trámites da matrícula, premendo aquí.
08/09/2021
Xa podes consultar a biografía de Xoán Manuel Pintos no Álbum de Galicia
O Álbum de Galicia, colección dixital de biobibliografías do Consello da Cultura Galega, acaba de incorporar a entrada de Xoán Manuel Pintos (Pontevedra, 1811 - Vigo, 1876). Xurista de profesión, destacou polo seu activismo cultural e pola súa defensa da lingua galega, e como autor literario (cunha obra poética practicamente monolingüe en galego), está considerado coma o precursor do Rexurdimento Galego. Desde o punto de vista filolóxico, foi tamén un importante lexicógrafo. O texto biográfico que presentamos, asinado por María do Carme Ríos Panisse, está acompañado doutros recursos documentais (bibliografía, galería fotográfica, recursos en liña...), que permiten achegarse desde diferentes ópticas á vida e obra deste autor.
02/09/2021
A AGPTI convoca o IV Premio Xela Arias
A Asociación Galega de Profesionais da Tradución e da Interpretación (AGPTI) convoca a cuarta edición do Premio Xela Arias, creado para recoñecer o labor de empresas, entidades ou persoas que contribúan á promoción do uso do galego no mercado da tradución e da interpretación. Todas as persoas interesadas en presentar candidaturas teñen de prazo ata o vindeiro 15 de setembro de 2021 para enviar un correo electrónico a info@agpti.org co nome da candidata ou candidato e os motivos polos que se considera que merece o premio. Podes obter máis información sobre esta iniciativa premendo aquí.
27/08/2021
Praza de técnico/a de normalización lingüística no Concello de Carballo
O Concello de Carballo publica as bases da convocatoria para a provisión (como funcionario de carreira, grupo A1) dunha praza de técnico/a de normalización lingüística. O sistema de selección será o de concurso-oposición. Os/as aspirantes deben estar en posesión do título de licenciatura en Filoloxía Galego-Portuguesa, Filoloxía Galega ou Filoloxía Hispánica (subsección Galego-Portugués), grao en Lingua Galega, ou calquera outra licenciatura/grao da área de Humanidades ou ciencias xurídicas e Sociais, sempre que se acredite o Celga 5. O prazo de presentación de solicitudes será de 20 días naturais, contados a partir do seguinte ao da publicación do anuncio da convocatoria no Boletín Oficial do Estado (BOE).
26/08/2021
O CCG reúne nun volume os traballos filolóxicos de Aquilino Iglesia Alvariño
O Consello da Cultura Galega presenta a publicación «Da fonte máis fonda». Historia do vocabulario e outros escritos sobre o idioma galego, autoría de Aquilino Iglesia Alvariño. A obra inclúe a versión orixinal do texto «A lengua gallega. Historia do seu vocabulario», escrito por Iglesia Alvariño para ser incluído na Historia de Galiza (dirixida por Ramón Otero Pedrayo), pero que permanecía inédito ata o momento; así como outros traballos do mesmo autor sobre a norma, as ideoloxías lingüísticas e a situación xeral do idioma galego. A maiores, o volume contén tres estudos introdutorios de Ramón Villares, Henrique Monteagudo e Rosario Álvarez, que axudan a contextualizar os textos na súa etapa histórica, cultural e sociolingüística.
24/08/2021
Dicionario galego-ruso
A Xunta de Galicia presenta o Dicionario galego-ruso, unha obra lexicográfica con preto de 11.000 lemas deseñada como ferramenta de traballo para lingüistas, tradutores/as, docentes e alumnado que está a aprender os idiomas galego ou ruso. Trátase da primeira achega dun proxecto en continua actualización, que conta poder acadar na súa versión final unhas 40.000 entradas. O dicionario inclúe tanto léxico normativo sancionado pola RAG, como outros termos procedentes de obras de referencia da literatura galega. Podes ampliar información sobre esta iniciativa, así como acceder á obra en formato PDF, premendo aquí.
23/08/2021
Cursos Celga e de linguaxe administrativa nas escolas oficiais de idiomas
A Consellería de Cultura, Educación e Universidade convoca cursos de linguaxe administrativa galega (niveis medio e superior en liña) e mais cursos preparatorios para a obtención dos certificados de lingua galega (Celga), que se impartirán nas escolas oficiais de idiomas de Galicia no curso 2021/2022. Os cursos de linguaxe administrativa están dirixidos a empregados/as públicos/as das administracións autonómica e local galegas, e da Administración periférica do Estado en Galicia, exceptuando o persoal docente e sanitario. Aos cursos preparatorios dos Celga poderán asistir todas as persoas maiores de dezaseis anos interesadas. O prazo para presentar as solicitudes abranguerá desde o 1 ata o 10 de setembro de 2021, para os cursos do primeiro cuadrimestre; e desde o 4 ata o 14 de xaneiro de 2022, para os cursos do segundo cuadrimestre. Para consultar o texto completo da convocatoria, preme aquí.
23/08/2021
Curso sobre as metodoloxías da intervención social aplicables á normalización lingüística
A Coordinadora de Traballadores/as de Normalización da Lingua, en colaboración co Concello de Santiago de Compostela e a Secretaría Xeral de Política Lingüística da Xunta de Galicia, organiza o curso "Ferramentas da educación social ao servizo da normalización lingüística", dirixido especialmente a técnicos/as de SNL, a docentes ou responsables de EDNLG e, en xeral, a traballadores/as do ámbito da normalización da lingua. O curso será impartido por Ana González Quinteiro, educadora social no Concello de Pontevedra, e as sesións desenvolveranse presencialmente os días 27 de setembro e 4 de outubro de 2021 en Santiago de Compostela. O prazo de inscrición será entre o 1 e o 19 de setembro de 2021. Podes ampliar información sobre os contidos e mais os trámites de inscrición premendo aquí.
23/08/2021
A Deputación de Pontevedra resolve as axudas a concellos para a promoción do galego
A Deputación de Pontevedra publicou a resolución das axudas aos concellos da provincia para a creación e mantemento de servizos de normalización lingüística, así como para o desenvolvemento de actividades de dinamización e promoción do idioma galego. Podes consultar a listaxe de entidades beneficiarias premendo aquí.
23/08/2021
Resolución das subvencións para a edición de materiais didácticos
A Consellería de Cultura, Educación e Universidade publica a resolución das axudas para a edición en lingua galega de recursos didácticos curriculares para niveis non universitarios. Podes consultar a listaxe de entidades beneficiarias no DOG do 17 de agosto de 2021.
23/08/2021
Resólvense as axudas para a tradución do libro galego
A Consellería de Cultura, Educación e Universidade publica, no DOG do 13 de agosto de 2021, a listaxe de entidades beneficiarias das axudas dirixidas á tradución para outras linguas de obras publicadas orixinariamente en galego e á tradución para o galego de obras publicadas orixinariamente noutras linguas. Podes consultar o texto completo da resolución premendo aquí.
23/07/2021
Unha tese da UVigo constata os beneficios da socialización bilingüe na etapa infantil
A investigadora Marta Díaz Ferro presentou na Universidade de Vigo a súa tese de doutoramento sobre a socialización bilingüe infantil nunha escola de Vigo. O estudo, accesible en formato PDF no repositorio institucional da universidade, analiza o impacto da socialización e alfabetización en galego en nenos de 4 e 5 anos procedentes de familias castelanfalantes e bilingües galego-castelán. Entre as súas conclusións Marta Díaz afirma que "o bilingüismo conseguido, na etapa estudada, tenderá a ser aditivo, xa que non se observa que os nenos sufran dunha merma comunicativa por causa do input en galego". A tese contén tamén unha serie de propostas en relación coa vehicularidade do galego no ensino non universitario, confrontando o recollido no Decreto 79/2010 cos resultados da investigación.
23/07/2021
Estudo sobre a toponimia municipal da provincia da Coruña
O Seminario de Onomástica da Real Academia Galega presenta o estudo "Os nomes dos concellos da provincia da Coruña", autoría de Gonzalo Navaza. Nesta publicación ofrécese un comentario histórico e etimolóxico sobre cada un dos nomes dos 93 concellos coruñeses, indicando os rexistros documentais máis antigos dos que se ten coñecemento, as diferentes evolucións ou alteracións que sufriu o topónimo ao longo do tempo e a explicación sobre o seu significado. Na páxina web da RAG podes consultar tamén a súa colección de traballos sobre onomástica, así como a colección específica Terra Nomeada, na que se compilan estudos toponímicos sobre diferentes concellos galegos.
22/07/2021
Contratación temporal de técnico/a de normalización lingüística
O Concello de Quiroga publica as bases do proceso selectivo para a contratación temporal (ata o 15 de outubro de 2021) dun técnico de normalización lingüística, que desenvolverá o seu traballo na agrupación de concellos de Quiroga e Ribas de Sil. O sistema de selección será o concurso-oposición. Os/as aspirantes deben estar en posesión dalgún dos seguintes graos: Lingua e Literatura Galegas; Estudos de Galego e Español; Galego e Portugués: Estudos lingüísticos e literarios, ou as licenciaturas equivalentes aos ditos graos, ou calquera titulación das áreas de Humanidades ou Ciencias Xurídicas e Sociais (sempre que teñan o Celga 5). O prazo de presentación de solicitudes remata o vindeiro 26 de xullo de 2021. Podes consultar as bases e o modelo de solicitude premendo aquí.
Seguinte Último
Arquivo web: Coordinadora Galega de Normalización e Dinamización Lingüística (2009-2016)
Iniciativa do CCG que ofrece unha colección de sitios web para preservar e garantir o acceso ao patrimonio documental galego en liña.
Loia: Guía aberta á lingua galega
Os elementos fundamentais para iniciarse no coñecemento do idioma galego
Libro de marcadores sociais do CDSG
Libro completo de marcadores, dispoñible para compartir en rede, do que se extrae a selección de referencia que podes consultar en De Bolina
publicacions


Portada de  Informe sobre os arquivos públicos en Galicia. Informe sobre os arquivos públicos en Galicia. (2019)
Dolores Pereira Oliveira. Autoría / Olimpia López Rodríguez. Autoría / Mariám Mariño Costales. Autoría /


Portada de  Mosteiro de Montederramo Mosteiro de Montederramo (2019)
Ramón Lorenzo Vázquez. Autoría / Maka Pérez. Autoría /


Portada de  Repensar Iberia Repensar Iberia (2019)
Teresa Albuquerque. Coordinación / José Luís Ferreira. Coordinación /


Portada de  Antroponimia e lexicografía Antroponimia e lexicografía (2018)
Ana Isabel Boullón. Edición /






Ver todas
Últimas NOTICIAS
17/09/2021
Outes promove o uso do galego no comercio local
16/09/2021
Bota a andar no campus de Pontevedra o programa Falamos
16/09/2021
Comeza unha nova edición do certame #TEDSaúde
14/09/2021
Bolsa de formación no SNL do Concello de Ames
14/09/2021
Probas para a obtención dos certificado Celga
09/09/2021
O Concello do Grove presenta un programa de fomento do galego entre a mocidade
09/09/2021
Obradoiro de podcast en galego na USC
08/09/2021
Xa podes consultar a biografía de Xoán Manuel Pintos no Álbum de Galicia
02/09/2021
A AGPTI convoca o IV Premio Xela Arias
27/08/2021
Praza de técnico/a de normalización lingüística no Concello de Carballo

Consello da Cultura Galega en Facebook Consello da Cultura en Twitter

Identidade | Perfil do contratante | Lei de Transparencia | Aviso Legal | | Pazo de Raxoi, 2º andar - 15705 Santiago de Compostela - A Coruña. Teléfono: +34 981957202 Fax: +34 981957205