Rafael Dieste desenvolve un amplo traballo literario non só en lingua galega senón tamén en castelán, consecuencia da súa andaina vital que o leva primeiro, voluntariamente a Madrid nos anos 30, e despois, rematada a contenda civil española, ao exilio arxentino.

En Bos Aires prosegue o seu compromiso coa cultura galega e participa en moitas das iniciativas da nosa colectividade. O Arquivo Sonoro de Galicia dispón de gravacións recollidas a finais dos anos 50 nas que o escritor rianxeiro dá conta da súa visión ética centrada na teoría estética.