congreso

ROSALíA DE CASTRO NO SéCULO XXI. UNHA NOVA OLLADA

Rosalía de Castro no SXXI. Unha nova ollada

De Febreiro a Xuño de 2013
Información

Co gallo da conmemoración en 2013 do 150 aniversario da publicación en Vigo de Cantares Gallegos, obra fundacional do Rexurdimento das letras galegas, o Consello da Cultura Galega convoca este Congreso, que se realizará na sede da institución en Santiago de Compostela. Conta cunha programación presencial de conferencias e mesas redondas e con outra virtual, aberta a comunicacións libres.

O Congreso presencial desenvolverase en cinco xornadas mensuais, en sesións de mañá e tarde, entre febreiro e xuño, e contará coa participación tanto dos máis destacados expertos nacionais e internacionais na obra rosaliana coma dun número importante de investigadores máis novos. Todos eles achegarán olladas renovadoras dende distintos campos do coñecemento –historia da ciencia e do pensamento, migracións, ecdótica, historia da prensa, teoría da literatura, etc.–, coa vontade de que esa interdiscipinariedade nos permita acadar un coñecemento máis amplo e profundo. Os principais obxectivos do Congreso son:

  • Amosar a vixencia da obra de Rosalía no século XXI e alentar o seu aprecio por parte do público galego e non galego de todas as xeracións.
  • Acoller e poñer de relevo as novas perspectivas de análise que se foron producindo nas últimas décadas, despois do extraordinario pulo que para os estudos rosalianos supuxo o Congreso Internacional sobre Rosalía de Castro e o seu tempo, que tivo lugar en 1985 e no que tamén participou o Consello da Cultura Galega.
  • Estimular novas lecturas críticas da obra rosaliana para propiciar o avance do seu coñecemento.

O Congreso virtual
O Congreso terá tamén unha parte virtual aberta a comunicacións libres, coas mesmas liñas temáticas do Congreso presencial.

 

Ficha técnica
Rosalía de Castro no SXXI. Unha nova ollada
Rosalía de Castro no SXXI. Unha nova ollada
Congreso. De Febreiro a Xuño de 2013
Comité científico
Rosario Álvarez Blanco
Anxo Angueira
María do Cebreiro Rábade
Catherine Davies
Francisco Javier Gómez Montero
Helena González Fernández
Kathleen N. March
Helena Miguélez
Dolores Vilavedra
Ramón Villares
Organiza
Rosario Álvarez Blanco
Anxo Angueira
María do Cebreiro Rábade
Dolores Vilavedra
Secretaría
Rosa Aneiros
Xosé Manuel Lens
Organiza
Consello da Cultura Galega

LUGAR
Consello da Cultura Galega
Pazo de Raxoi, 2º andar
Praza do Obradoiro, s/n
15705 Santiago de Compostela
Tel. 981 957 202
www.consellodacultura.org