O vindeiro xoves, 29 de xaneiro ás 12:00 horas, o Consello da Cultura Galega e o Instituto da Lingua Galega presentarán en rolda de prensa a publicación Lingua e identidade na fronteira galego-portuguesa. Trátase dun volume que recolle dez contribucións orixinais de 14 especialistas que se achegan a esta realidade limítrofe desde unha perspectiva histórica, antropolóxica e lingüística. Na rolda de prensa explicarán os traballos previos desta monografía, que parte do simposio homónimo realizado en Santiago a finais de 2013.
