O Padre António Vieira foi un auténtico best-seller no século XVIII en Portugal. O seu legado comprende máis de 15.000 páxinas que agora se reúnen por primeira vez. Esta Obra Completa, que abrangue 30 tomos nos que se recolle o seu pensamento e obra, preséntase este luns 30 de maio no Consello da Cultura Galega.

Na rolda de prensa do luns 30 de maio ás 12:00 horas, estarán os directores deste proxecto, José Eduardo Franco e Pedro Calafate, así como o presidente do Consello da Cultura Galega xunto con outros investigadores deste relevante personaxe ao que Fernando Pessoa chamou “emperador da lingua portuguesa”.

Intervirán: Ramón Villares, presidente do Consello da Cultura Galega; José Miguel Sagüillo Fernández-Vega, decano da Facultade de Filosofía da Universidade de Santiago de Compostela; Acílio Estanqueiro Rocha, professor catedrático da Universidade do Minho; Pedro Calafate, professor catedrático da Universidade de Lisboa; José Eduardo Franco, Investigador Principal da Universidade Aberta-Lisboa; Isabel Morán, profesora titular do departamento de Filoloxía Galega da Universidade de Santiago de Compostela.