El esplendor del Pórtico de la Gloria: conservación, policromía y la transfiguración de la materia

7 e 8 de xullo de 2016

Información

Presentación
Programa

Este simposio, incluído no programa de actividades definido na colaboración establecida entre a Fundación Andrew W. Mellon e o Programa Catedral de Santiago de Compostela, en torno aos traballos de estudo e restauración do Pórtico da Gloria, reúne unha serie de destacados restauradores, científicos e historiadores da arte que participan no Programa Catedral de Santiago, xunto a un selecto grupo de recoñecidos expertos internacionais. Ademais de presentar unha visión de conxunto dos resultados obtidos polos equipos multidisciplinares que traballaron no Pórtico da Gloria desde 2008, o simposio ofrece a oportunidade de dar a coñecer e debater novas achegas a aspectos tan relevantes para a conservación do patrimonio como poden ser os novos procedementos para a limpeza e consolidación da policromía en escultura de pedra, o desenvolvemento de plataformas dixitais interactivas para o procesado e visualización de datos ou as tecnoloxías de vangarda que permiten a restitución virtual das policromías históricas.

O simposio conta coa coordinación científica do dr. Francisco Prado-Vilar (coordinador científico do Programa Catedral de Santiago; director do Programa Andrew W. Mellon para o Pórtico da Gloria, Universidade de Harvard, Real Colegio Complutense). As súas sesións estarán abertas ao público para que, deste modo, a vertente científica dun encontro de reputados especialistas internacionais se vexa completada cunha acción de divulgación que permita achegar á cidadanía a realidade e o avance do proxecto de intervención o Pórtico da Gloria.

O Programa Catedral de Santiago de Compostela é promovido pola Fundación Catedral e a Fundación Barrié en colaboración co Instituto de Patrimonio Cultural de España do Ministerio de Educación, Cultura y Deporte e a Xunta de Galicia. A restauración do Pórtico da Gloria, englobada no Programa Catedral, é posible grazas ao mecenado da Fundación Barrié.