A comunicación móbil configúrase como un dos elementos característicos e definitorios do ecosistema dixital que enmarca a sociedade rede da segunda década do terceiro milenio. As tendencias dos últimos anos mostran un crecemento espectacular no tráfico de mensaxes nestes dispositivos. E todos os indicadores e estudos de referencia apuntan que este modelo comunicativo e cultural veu para quedar.

Algúns datos recentes achegan evidencias da importancia destes dispositivos móbiles no ámbito da comunicación e da cultura. No ano 2016, o tráfico de Google alcanzou a marca do 50 por cento para dispositivos móbiles por primeira vez, fronte a un 42 por cento nos dispositivos de escritorio. E no ano 2017 esta cifra medrou ata o 60 por cento, mentres o de Facebook pasou do 78 por cento ao 87 por cento.

Neste contexto, o obxectivo desta xornada é analizar como a sociedade móbil está mudando usos e consumos de produtos culturais. Trátase de dispoñer de visións do novo marco, nas vésperas da cuarta revolución industrial, e da situación da cultura galega nese escenario en construción.

Esta primeira xornada que promove o Consello da Cultura pretende, pois, xuntar especialistas que sitúen e definan o marco xeral da actual comunicación móbil. A partir destas achegas, organizaranse diferentes actividades para analizar as consecuencias en todos os ámbitos do ecosistema cultural galego e fomentar o debate con actores do sector cultural do noso país.