Poetas itinerantes : Poetes itinerants

Encontro de poesía galega e catalá. Santiago

Santiago de Compostela, 13 de decembro de 2017 ás 19 horas
Información

Logo da cancelación da actividade o pasado mes de outubro, o programa “Poetas itinerantes” recunca por fin en Galicia. Logo do diálogo entre a poesía vasca e galega que tivo lugar en Santiago de Compostela na primavera de 2016, é o tempo de que voces galegas e catalás unan os seus versos para nos ofrecer unha mostra da poética contemporánea que se está a facer en Galicia e Cataluña. Xa o fixeron o pasado día 2 de novembro no Pipa Club de Barcelona e, nesta ocasión, é a delegación catalá quen visita Galicia coas súas maletas cheas de versos para dialogar coa poesía galega.


Os poemas de Anna Gual, Joan Pons, Blanca Llum Vidal, Marilar Aleixandre, Yolanda Castaño e Rosalía Fernández Rial daranse a man nun encontro en Santiago que terá lugar o mércores, 13 de decembro de 2017, ás 19 horas no Consello da Cultura Galega.


O acto será presentado por Mercedes Queixas, membro da Sección de Lingua, Literatura e Comunicación do Consello da Cultura Galega e secretaria da Asociación de Escritoras e Escritores en Lingua Galega.


Promovido polo Instituto Etxepare, o Instituto Ramón Llull e o Consello da Cultura Galega, este recital forma parte dun proxecto iniciado en Barcelona en 2015 que procura tender unha ponte máis cara a un futuro intercultural e multilingüe. Na edición anterior deste recital Poetas itinerantes foron as voces de Miren Agur Meabe, Leire Bilbao, Anxo Angueira, Gonzalo Hermo, Dores Tembrás e Manuel Rivas quen deixaron o pouso dos seus versos en Compostela e tamén en Donosti durante a visita de volta que se produciu en outono de 2016 no Edificio de Tabakalera. Nesta ocasión, será a poesía catalá quen se deixe sentir nos muros compostelás para establecer un diálogo necesario e posible entre as diferentes culturas

Ficha técnica
Poetas itinerantes : Poetes itinerants
Poetas itinerantes : Poetes itinerants
Recital. Santiago de Compostela, 13 de decembro de 2017 ás 19 horas
Participante
Marilar Aleixandre
Yolanda Castaño
Rosalía Fernández Rial
Anna Gual
Joan Pons
Blanca Llum Vidal
Presenta
Mercedes Queixas
Organiza
Comisión de Acción Exterior (CCG)
Instituto Ramón Llull
Instituto Vasco Etxepare
Sección de Lingua, Literatura e Comunicación (CCG)