A presente convocatoria dos Encontros será a décima, todo un fito indicativo da consolidación e madureza dunha iniciativa que naceu e se vén alimentando das suxestións, propostas e colaboracións de colectivos, profesionais e persoas comprometidas na normalización da lingua. Tamén se cumpren este ano 2006 os dez anos da creación do Centro de Documentación Sociolingüística de Galicia do Consello da Cultura Galega, promotor e organizador dos Encontros.
Nesta X edición introducimos unha novidade importante no programa, cal é a consideración de cuestións relacionadas coa planificación lingüística no sistema educativo, en particular, un elemento ao que se lle ten atribuído un papel dinamizador de grande importancia: os equipos de normalización lingüística dos centros de ensino. Ao introducirmos este asunto, agardamos contar coa presenza de persoas implicadas nesta área de actividade, o que suporá a diversificación do público asistente aos Encontros. O devandito non significa tanto que o centro de interese tradicionalmente dos Encontros (as administracións públicas) varíe, como que ampliamos a perspectiva, co obxectivo de lograr unha maior sinerxia dos esforzos realizados entre os distintos sectores, para o que coidamos que se deben procurar e estimular distintas vías de coordinación.
Noutros aspectos, o programa destes X Encontros segue as liñas emprendidas anteriormente. Queremos chamar a atención sobre tres puntos concretos: a importancia da reforma do Estatuto de Autonomía de Galicia e o novo estatus legal que o galego pode adquirir neste marco; a importante e delicada cuestión dos perfís lingüísticos nos postos das administracións públicas, sobre a que encargamos un traballo específico a dous reputados expertos administrativistas; e o problema emerxente da inmigración e o seu tratamento desde a perspectiva da integración sociocultural e a normalización lingüística. De resto, daremos continuidade á experiencia que estreamos na convocatoria pasada, o espazo Proxecta, en que se presentan empresas, experiencias e materiais relacionados coa normalización lingüística, e que suscitou un grande interese, tanto do público coma dos expositores.
Co esforzo e a participación de todos e todas, aprendendo da propia experiencia e do coñecemento de experiencias semellantes, mediante a reflexión, o diálogo e a colaboración, esperamos seguir contribuíndo a abrir o camiño da normalización do idioma galego, o que constitúe a grande empresa que nos inspira e nos anima.
Warning: include(inc_eventos_serie2.php) [
function.include]: failed to open stream: No such file or directory in
/var/www/html/consello/html/www/evento.php on line
458
Warning: include() [
function.include]: Failed opening 'inc_eventos_serie2.php' for inclusion (include_path='.:/usr/share/pear:/usr/share/php') in
/var/www/html/consello/html/www/evento.php on line
458
