O Encontro Monográfico co Patrimonio Cultural 19 viaxa a Portugal, en concreto ao Parque Arqueológico do Vale do Terva/PAVT, no concello de Boticas, no norte portugués. O PAVT é un proxecto conxunto do Município de Boticas e da Universidade do Minho, que resulta dunha visión asentada nunha concepción bioeconómica do mundo, que ten como paradigma de xestión o ‘desenvolvemento sostible’, que se caracteriza pola preocupación pola integración ambiente-economía e coevolución, polo crecemento económico adaptado ás capacidades biofísicas e ás variacións socioculturais e polas necesidades de adaptacións estruturais, políticas, económicas e tecnolóxicas para xestionar os procesos de cambio.

Preténdese que o PAVT sexa un parque arqueolóxico con carácter xeográfico continuo, cun conxunto de sitios arqueolóxicos e monumentos históricos que se constitúen como elementos patrimoniais relevantes e representativos das diversas paisaxes que se configuraron na longa ocupación humana do territorio. O obxectivo principal será sempre o da promoción do seu territorio, apoiado na exploración das súas potencialidades a nivel do turismo histórico, cultural e da natureza e da economía agropecuaria, que deben ser soportadas pola investigación continuada e consecuente transferencia de coñecemento.

A compoñente de valorización do proxecto PAVT oriéntase cara á cualificación do gozo do patrimonio por parte do público, concretándose nun conxunto de accións prioritarias para a persecución dese obxectivo: clasificación do complexo mineiro antigo como ben cultural, construción de infraestruturas e instalación de equipamentos, así como promoción, divulgación e desenvolvemento de estudos e proxectos.