As relacións entre Galicia e Portugal teñen unha importancia estratéxica, económica e sociocultural moi destacada, razón pola que o Consello da Cultura Galega ten salientado o seu fortalecemento como unha liña de acción prioritaria. A crise agravou unha situación xa en si mesma feble, abocando a unha falta de propostas e á perda de avances significativos, como  se reflicte no propio esmorecemento da Eurorrexión Galicia-Norte de Portugal. Precisamos, uns e outros, transcender a conxunturalidade para xerar liderado, discurso e propostas capaces de actualizar e dinamizar a nosa relación en clave de país; mais para iso tamén cómpre superar as trabas e propiciar encontros e alianzas que favorezan o progreso e a comprensión mutua de ambas as dúas comunidades.

O Foro Inés de Castro xorde como unha proposta de encontro para concretar as relacións entre Galicia e Portugal no século XXI. Tres son os seus eixes esenciais: coñecemento, reflexión e acción. Os seus obxectivos son:

• Diagnosticar os trazos esenciais do momento actual das relacións galego-portuguesas e do papel de Galicia no favorecemento das relacións ibéricas.
• Propiciar unha posta ao día permanente do coñecemento respectivo nos trazos esenciais das relacións galego-portuguesas.
• Fundamentar as iniciativas de achegamento a todos os niveis entre Galicia e Portugal e idear posicionamentos compartidos tanto no espazo europeo coma nun ámbito global.
• Suxerir propostas concretas que permitan facer avanzar as nosas relacións a todos os niveis, con especial atención ao eido cultural.
• Idear propostas para alentar unha adecuada proxección exterior dos mecanismos de cooperación.
• Trasladar aos actores implicados as suxestións debidas, co ánimo de alentar un maior desenvolvemento das complementariedades mutuas.

 O Foro Inés de Castro concrétase na realización de conferencias, coloquios ou seminarios en Galicia e Portugal arredor de temas de interese común que permitan actualizar as nosas percepcións respectivas e intercambiar coñecemento e suxestións. A axenda  contempla  tanto actividades abertas ao público xeral coma outras reservadas a un público convidado, seleccionado especialmente por razón de oportunidade ou da natureza das mesmas.  O Foro prevé a organización inicial de dúas citas anuais, alternantes en Galicia e en Portugal. 

 

As actividades coordinaranse entre o Consello da Cultura Galega e o Instituto Camões. 

Solicita a túa inscrición

Warning: include(inc_eventos_serie2.php) [function.include]: failed to open stream: No such file or directory in /var/www/html/consello/html/www/evento.php on line 423

Warning: include() [function.include]: Failed opening 'inc_eventos_serie2.php' for inclusion (include_path='.:/usr/share/pear:/usr/share/php') in /var/www/html/consello/html/www/evento.php on line 423