Manuel Sendón é un dos fotógrafos e dos investigadores da fotografía máis destacados da actualidade, comisario de exposicións e tamén profesor na Facultade de Belas Artes de Pontevedra. Dirixe o proxecto Inédito e, con X. L. Suárez Canal, o Centro de Estudos Fotográficos.

A exposición Tempos que hai neste tempo, que se identifica cunha serie fotográfica do mesmo nome e que se desenvolve entre 1991 e 1994, componse dun conxunto de obras nas que o autor reflexiona sobre o paso do tempo, unha das súas temáticas máis traballadas xunto coa memoria e a paisaxe. A súa é unha poética de realismo documental que aposta pola calidade técnica, en imaxes documentais presentadas coa máxima claridade. 

O proxecto completouse coa edición dun extenso catálogo de coidado deseño e con textos de Christian Caujoulle e Manuel Rivas.