O Consello da Cultura Galega acolle a presentación do libro-cd Antonio Fraguas e a memoria musical de Cotobade da autoría de Xavier Groba e editado por aCentral Folque. Participan: Dolores Vilavedra, Xavier Grova, Ramón Castromil e Ramon Pinheiro Almuinha.

Un cancioneiro musical inédito de Antonio Fraguas? Unha colección de partituras de Cotobade compilada por Saturnino Cuiñas conservada nos Arquivos de Cántigas da terra? As gravacións dos traballos de campo realizados na zona por investigadores internacionais ou galegos como Alan Lomax, Gustav Henningsen ou María Vidal? Todo isto e moito máis está recollido nesta monumental obra sobre o rico e singular patrimonio musical de Cotobade. Un estudo realizado polo musicólogo Xavier Groba que supón a primeira achega profunda á música de transmisión oral deste Concello situado entre a vila de Pontevedra e a comarca de Terra de Montes. O libro conta ademais dos textos coas gravacións orixinais contidas no CD, abundantes transcricións musicais realizadas por José Luís do Pico e unha extraordinaria selección fotográfica.     

Ficha do Libro-CD
Edita: aCentral Folque
Colección: Chave Mestra. Ref: CM17
Páxinas: 240
Fotografías orixinais: 70
Idiomas: galego
Inclúe partituras
ISBN 978-84-949511-8-3
PVP: 20€