O Consello da Cultura Galega (CCG) e a Secretaría Xeral de Emigración presentarán a reedición da obra de Eduardo Vicenti “Estudo sobre a emigración galega”, un volume fundamental para entender o fenómeno migratorio. Este volume foi un traballo renovador na súa época tanto pola forma de guía, como polo contido no que se ofrecía unha lectura positiva do éxodo. A presidenta do CCG, Rosario Álvarez; o secretario xeral de Emigración, Antonio Rodríguez Miranda; xunto con Xosé Manoel Núñez Seixas, historiador e vicepresidente do CCG; e o autor do prólogo Raúl Soutelo, participarán no acto de presentación deste volume. Na rolda darán conta da relevancia deste traballo que constitúe o segundo volume da colección que reedita clásicos da emigración galega.