Ciclo en liña: Os xoves (RE)PENSAMOS

6. Ana Abad Carlés e a danza no século XXI

Os xoves (RE)PENSAMOS

As circunstancias extraordinarias que estamos a vivir obrígannos a repensar e a repensármonos. Por iso, neste tempo de confinamento en que non nos podemos xuntar para Pensarmos presencialmente no Consello da Cultura Galega cada terceiro xoves de mes, imos ir ofrecendo semanalmente a visión de distintos pensadores e pensadoras sobre temas de actualidade diversa para irmos construíndo coñecemento e suscitando o necesario debate. Para isto aproveitaremos os contidos do segundo volume de O(s) sentido(s) da(s) cultura(s) que acaba de ver a luz. Ao texto escrito sumaremos as gravacións das conferencias que inclúen os debates a que deron lugar, en interacción co público, entre o que se conta un selecto grupo de convidados e convidadas que tiñan acceso previo aos textos e opinión meditada. Nestes días en que conmemoramos o Día Mundial da Danza traemos á investigadora Ana Abad Carlés, quen nos falará da danza nos albores do século XXI e da necesidade de que "ela atope o seu propio baile".

Información
U-las mulleres? Cando se observa o acontecido nas artes ao longo do século xx, é doado reconecer unha pauta no xeito en que as mulleres atoparon o seu camino de forma lenta, mais obstinada, nos diferentes medios artísticos. O camiño é longo e difícil de seguir e a realidade amosa que, malia que as mulleres se introduciron de maneira importante nestes sectores profesionais, continúan a ser unha minoría nos seus postos de liderado. A investigadora ANA ABAD CARLÉS recorre a unha frase da coreógrafa Cathy Marston cando, ao falar da súa carreira, afirma que estaba escavando túneles para as xeracións futuras. Así, explica: “Máis unha vez, a artista ha de escavar un túnel que, malia ter sido escavado moitas veces con anterioridade, volveu ser tapado tan pronto como chegou ao seu final. O sentido de continuidade histórica desaparece e á muller tócalle empezar de novo desde o principio. Seguindo aquelas palabras xa citadas doutra gran pioneira, Martha Graham, ela ten que atopar o seu propio baile. Ana Abad analiza, mediante entrevistas e distintas fontes estatísticas, a escasa presenza actual das mulleres na danza en ámbitos como a coreografía e dirección e incide na necesidade de coñecermos o traballo, negado e ocultado, de creadoras precedentes para lograr aquilo que con extraordinaria lucidez defendeu Virginia Wolf en A Room of One’s Own (Un cuarto de seu) (1929): Non podemos comprender o presente se o separamos do pasado. Se queremos entender o que estamos a facer agora […] debemos esquecer que somos, por agora, nós mesmas. Debemos converternos na xente que fomos hai dúas ou tres xeracións". Porque “Para comprender a realidade actual é necesario pensar no destino que tiveron esas xeracións de coreógrafas que abriron e continuaron caminos durante o s. xx. Ao mesmo tempo que a súa carreira e obras desaparecían das páxinas da historia, a súa posición como modelos para as futuras xeracións foi perdendo forza. Quizais os seus camiños non fosen continuados polas xeracións actuais ao se esqueceren os seus puntos de vista e as súas posicións dentro do contexto da danza do século pasado”.


Escavando túneles: A danza nos albores do século XXI.

ANA ABAD CARLÉS
Ficha técnica
6. Ana Abad Carlés e a danza no século XXI
6. Ana Abad Carlés e a danza no século XXI
Ciclo en liña. Os xoves (RE)PENSAMOS
Participante
Ana Abad Carlés
María Xosé Agra Romero
Ramón Máiz Suárez
Organiza
Consello da Cultura Galega
Sección de Pensamento (CCG)

Consello da Cultura Galega
Pazo de Raxoi, 2º andar
Praza do Obradoiro, s/n 15705
Santiago de Compostela
Tel.: 981 957 202 / Fax.: 981 957 205