Escoita comentada. Colección de lousas do Arquivo Sonoro de Galicia (CCG)

24 de marzo de 2021 ás 18:00 horas
Información
En directo no enlace de youtube da entidade organizadora: https://youtu.be/D4dbSblL5w4
O Consello da Cultura Galega colabora coa realización das xornadas "O QUE NON SE ESCRIBE. ARQUIVOS SONOROS E CREACIÓN CONTEMPORÁNEA", que se celebrarán en Santiago de Compostela entre os días 24 e 27 de marzo de 2021.

Unha actividade de aprendizaxe e experimentación sobre o noso patrimonio sonoro, unha posta en común dos proxectos máis actuais arredor da música tradicional desde unha óptica tan propia como global. Un proxecto único que pon no foco o proceso desde o máis antigo ao máis contemporáneo. O que fomos, o que somos e o que tendemos a ser como país musical.

Podes consultar o programa en: https://www.luneda.gal/o-que-non-se-escribe.

Pódese seguir en directo no enlace de youtube da entidade organizadora: https://youtu.be/D4dbSblL5w4

Entre as actividades previstas, o Consello da Cultura organiza unha "ESCOITA COMENTADA. COLECCIÓN DE LOUSAS DO ARQUIVO SONORO DE GALICIA DO CONSELLO DA CULTURA GALEGA", realizada por Xosé Ramón Pousa e Cristina Pujales, e que se realizarán de forma presencial o 24 de marzo ás 18:00 horas na sede do Consello da Cultura Galega.

No ASG do CCG consérvanse preto de setecentas lousas de contido galego: desde as primeiras gravacións de 1904 do Coro Aires da Terra de Pontevedra ou os numerosos rexistros editados na emigración bonaerense e cubana, até cancións galegas interpretadas polas voces máis destacadas da época.

A evolución das técnicas de gravación sonora electromagnéticas, en vinilo e cinta magnética e, posteriormente, o son estereofónico, remataron cos gramófonos e retiraron da circulación os discos de pedra, que hoxe son unha rareza custodiada por coleccionistas. As lousas representan os comezos da industria cultural na sociedade de masas e permitiron a conservación até os nosos días tanto das gravacións históricas galegas como das producións sonoras impulsadas pola emigración en América. As setecentas gravacións en pedra que o Arquivo Sonoro de Galicia ten reunidas até o momento, reflicten o noso patrimonio sonoro desde 1900 até finais da década dos 50.
Materiais
Ficha técnica
Escoita comentada. Colección de lousas do Arquivo Sonoro de Galicia (CCG)
Escoita comentada. Colección de lousas do Arquivo Sonoro de Galicia (CCG)
Encontro. 24 de marzo de 2021 ás 18:00 horas
Consello da Cultura Galega
Pazo de Raxoi, 2º andar
Praza do Obradoiro, s/n
15705 Santiago de Compostela
Tel.: 981 957 202 / Fax: 981 957 205