Nieves Fernández Vidueira

A irmandade coa natureza

Xoves, 21 de outubro de 2021
Información
Este ano 2021 o Consello da Cultura Galega aposta por poñer o foco sobre o rural e as súas mulleres, para recoñecer -a través da súa posta en valor- o seu papel estrutural nunha parte da sociedade da que manan aspectos esenciais da nosa cultura e da nosa identidade.

Unha desas mulleres é Nieves Fernández Vidueira, que aínda que se define a si mesma como pastor, certamente é unha pastora, criadora de ovellas de raza galega, e vinculada a diferentes entidades activas na mellora do rural. Adherida á asociación ASOVEGA, ao Consello Regulador de Agricultura Ecolóxica de Galicia (CRAEGA) e á entidade “Pastos e Forraxes”. É ademais socia fundadora da Asociación de Defensa Sanitaria Gandeira de Ovino e Caprino de Galicia (ADSG-Acivo), e participou activamente na Asociación de Criadores/as de Ovino e Caprino de Galicia (OVICA) e na Asociación de Mulleres Rurais de Viana do Bolo. Como tantas mulleres do rural, a súa actividade non é única, senón que se multiplica case de xeito natural no seu entorno, participando de todos aqueles aspectos que conforman o seu espazo social, sendo ademais escritora, fotógrafa, tallista da madeira, deseñadora e creadora de traxes, disfraces e máscaras de entroido, sen perder de vista as innovacións en materia de produción ecolóxica.

Esta xornada, organizada polo Centro de Documentación en Igualdade e Feminismos, pretende constituír un espazo de posta en valor e reflexión sobre a diversidade das contribucións das mulleres do rural, no mantemento dun espazo social, económico e natural, que se amosa vital na Galicia pasada e presente. Nela, o tempo de homenaxe mestúrase con tempo de memoria, de estudo, reflexión e cuestionamentos de futuro.

A historia de vida de Nieves Fernández Vidueira servirá como pretexto para reunir unha serie de voces de mulleres vencelladas ao rural, dende as actividades produtivas, dende o tecido asociativo, dende o mundo académico ou dende o institucional. A través das súas palabras e experiencias retratarán a diversidade coa que as mulleres rurais contribúen de xeito decisivo á sociedade galega, tratando cuestións que permitan entender e explicar os seus lugares e posicións no mundo do rural, así como expor e contrastar o xa feito, sen esquecer o que fica por facer.
Materiais
Temáticas
Ficha técnica
Nieves Fernández Vidueira
Nieves Fernández Vidueira
Xornada. Xoves, 21 de outubro de 2021
Coordinación
Rosa Arcos Caamaño
Luzia Oca González
Organiza
Centro de Documentación en Igualdade e Feminismos (CCG)
Consello da Cultura Galega

Consello da Cultura Galega
Pazo de Raxoi, 2º andar
Praza do Obradoiro, s/n 15705
Santiago de Compostela
Tel.: 981 957 202 / Fax.: 981 957 205