O ano do centenario será tamén o da edición de moitos textos inéditos de Álvaro Cunqueiro, nomeadamente os poéticos.

"O corpus poético do autor mindoniense duplicarase en breve", afirmou Manuel Forcadela, escritor e profesor da Universidade de Vigo, no Faladoiro que sobre a obra poética cunqueiriana tivo lugar no Consello da Cultura Galega. No faladoiro, introducido por Henrique Monteagudo, a profesora Teresa López (Universidade da Coruña) afirmou que o autor "intentou dar resposta desde a poesía aos problemas do home". Pola súa parte, Xosé Manuel Salgado (Universidade de Santiago de Compostela) subliñou a dimensión lírica de Cunqueiro "que foi un excelente poeta e foino toda a vida".

O Consello da Cultura Galega organizou, entre outras actividades conmemorativas do centenario de Álvaro Cunqueiro (Mondoñedo,1911-Vigo, 1981), once Faladoiros arredor da súa obra en todas as cidades galegas, ademais de Madrid e Barcelona. O próximo será en o 7 de xullo en Ourense.

Solicita a túa inscrición