Contido:
Programa galego, trátase dun magazine cultural de adscrición galeguista, dirixido e producido por Xosé Martínez Romero. Psicólogo de Familia, activista cultural en pro de Galicia e profesional en diversos medios de comunicación, a súa presenza neste espazo marcou unha sorte de retorno ás audicións “comprometidas” do exilio. De feito tiña con elas puntos de contacto, pois na súa xuventude Martínez Romero coñecera o matrimonio Seoane e tomara parte en institucións para a promoción da cultura galega alén mar, como AGUEA e a Asociación de Argentinos Hijos de Gallegos, coa que tamén se relacionaron Neira Vilas e Anisia Miranda.
