consello da cultura galega

Teléfono: +34 981 957 202 | web@consellodacultura.org


Olladas de mulleres no mundo
ciclo | No Centro Galego de Artes da Imaxe (A Coruña), do 3 ao 7 de marzo
Información

Co gallo do Día da Muller Traballadora, un ano máis o Consello da Cultura Galega e o CGAI dedícanlle unha semana da súa programación cun ciclo de cinema en que as figuras femininas son as protagonistas. O ciclo, coordinado por Encarna Otero da Comisión de Igualdade do CCG, leva como título  Olladas de muller no mundo. Creadoras galegas de imaxe . Esta é xa a súa segunda edición en colaboración co CGAI e dá continuidade ao proxecto fílmico Creadoras galegas de imaxe , no que directoras, guionistas, produtoras, actrices amosan outras olladas e perspectivas.


O ciclo comeza co único título de directores masculinos, Deux jours, une nuit/ Dos días, una noche, dos irmáns Dardenne, dúas veces gañadores en Cannes. Un filme sobre a muller no ámbito laboral nun contexto de crise. A intérprete principal, Marion Cotillard, foi candidata ao Oscar á mellor actriz polo seu papel de traballadora que intenta que os seus compañeiros renuncien á paga extraordinaria para ela conservar o seu posto na empresa.


O particular naturalismo dos Dardenne liga con Party girl/Mil noches, una boda, de Marie Amachoukeli-Barsacq, Claire Burger e Samuel Theis, o retrato dunha muller libre de 60 anos e as complexidades dos afectos e a contorna social. Pola súa banda, Amour fou, de Jessica Hausner, está inspirada na historia do poeta Heinrich von Kleist e a súa procura dunha compañeira para se suicidar en pleno Romanticismo alemán; ambas a dúas achegan senllos retratos femininos con forza.


Na sección Creadoras Galegas de Imaxe ofrécense dous títulos: Muller(es)Muller, de Inés Pintor, producido por SocialDocs, amosa a vida de mulleres dunha mesma familia pertencentes a tres xeracións distintas: as dificultades e diferenzas na educación, na percepción, no papel desempeñado…, e O tesouro de Corcoesto, adscrita ao documental militante e dirixida pola galega Cora Peña. A estes súmase Se dice poeta, da asturiana Sofía Castañón, que se aproxima a 21 poetas, entre elas tres galegas establecidas na Coruña: Yolanda Castaño, Estíbaliz Espinosa e María Couceiro. Estas últimas sesións contarán coa presenza das súas autoras.


Hemeroteca
02-03-2015
O Consello da Cultura Galega e o CGAI celebran o Día da Muller Traballadora cun ciclo de cine
Ficha técnica
Autoria
» Sofía Castañón
» Cora Peña
Coordinación
» Encarna Otero
Organiza
» Centro Galego de Artes da Imaxe (CGAI)
» Consello da Cultura Galega
Lugar de celebración

LUGAR
Centro Galego de Artes da Imaxe
Rúa Durán Loriga, 10 baixo
15003 A Coruña