Máis de cen cantores 3 corenta músicos ocuparán o escenario do Pazo da Cultura de Pontevedra nun concerto que homenaxeará a lírica e a música galegas. O programa ofrecerá dúas “Cancións xacobeas” (“Maria Soliña” e “Moi lonxe”) compostas por Antón García Abril sobre poemas de Celso Emilio Ferreiro (Celanova, 1912-Vigo, 1979). Seguiralle a “Cantata das cantigas” creada por Roxelio Groba en 2007, partindo de poemas populares do libro “Antífona da cantiga”, de Ramón Cabanillas (Cambados, 1876-1959) e rematará co “Caderno de bitácora de Valentín Paz Andrade. Esta partitura, que inclúe o recitado polo actor Xosé Barato, foi composta, a pedimento do Consello da Cultura Galega, expresamente para este concerto por Juan Durán en homenaxe a Valentín Paz Andrade (Pontevedra, 1898-Vigo, 1987), figura senlleira escollida este ano pola Real Academia Galega para a celebración do Día das Letras Galegas.
O Plenario do Consello da Cultura Galega decidiu en 2011 organizar anualmente un concerto conmemorativo do Día das Letras Galegas. O primeiro tivo lugar o 17 de maio dese ano e celebrouse na igrexa de San Domingos de Bonaval, en Santiago de Compostela. Nesta segunda edición a primeira institución cultural de Galicia conta coa colaboración do Concello de Pontevedra e o Consorcio de Santiago de Compostela.