NOTICIA

----

O Consello da Cultura presenta na Fundación “Luís Seoane” a exposición “Asociacionismo cultural en Galicia (1961-1975)”

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega en colaboración coa Fundación “10 de Marzo”, será inaugurada o xoves día 28 de febreiro ás 20 horas na Fundación “Luís Seoane” (rúa San Francisco, s/n, A Coruña). A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega: “O Galo”. No acto inaugural interviron Ramón Villares, presidente do Consello da Cultura Galega, Ricardo Gurriarán e Ana Fernández, concelleira de Cultura do concello de A Coruña. A exposición poderá visitarse ata o próximo 17 de marzo.

Deseñada por Xosé Díaz, a mostra puido verse nos meses de abril-maio-2012 no Museo do Pobo Galego (Santiago de Compostela), en outubro-novembro na Casa Galega da Cultura (Vigo), en decembro-2012 na igrexa da Magdalena en Ribadavia (Ourense) e en xaneiro-2013 no Círculo de las Artes de Lugo.