Esta cuarta edición, que conta co patrocinio do IGAEM e coa colaboración do Consello da Cultura Galega, o Concello de Santiago e La Voz de Galicia, presentarase oficialmente nun acto que acolle o CCG e que terá lugar mañá, xoves 20 de febreiro, ás 13,30h.

Ana Vallés e Baltasar Patiño, por parte da Sala Nasa, e Xesús Ron e Manolo Cortés, por parte do Teatro Galán, serán os encargados de faceren a presentación, que contará tamén coa presencia do vicepresidente do Consello da Cultura Galega, Ramón Castromil, así como coa dun representante do IGAEM e outro de INCOLSA.

Con esta nova edición, Alternativa consolídase como unha das citas máis singulares e arriscadas dentro do panorama cultural galega posto que é unha iniciativa independente que aposta por propostas de música, teatro e danza moi difíciles de contemplar nos circuítos clásicos de exhibición. Neste festival quérese ofrecer, ademais, unha visión actual e comprometida coas novas linguaxes escénicas, o que nos permitirá ver montaxes procedentes de Madrid, Bilbao, Barcelona ou Viena, absolutamente inéditas en Galicia.