Estas xornadas reúnen por vez primeira a reputados especialistas en biotecnoloxía que se sentarán con historiadores, lingüísticas e arqueólogos para poñer en común os seus métodos e teorías coas que tentan explicar a orixe e evolución dos pobos do Noroeste Peninsular.
Os coordindadores do encontro, o director do Instituto de Medicina Legal da Universidade de Santiago de Compostela, Anxo Carracedo, e o historiador da USC, Xerardo Pérez Menaut, foron os encargados de reunir ós relatores deste congreso, procedentes de Barcelona, Salamanca, Portugal e Galicia como Jaume Bertranpetit, António Amorin, Xosé Manuel Vázquez Varela, Claudio Torres ou Antón Santamarina
Segundo os seus organizadores, con este encontro pioneiro no seu carácter interdisciplinar, preténdese achegar disciplinas que ata o de agora traballaban sen contacto, ignorando unha o que facía a outra. O obxectivo final é extraer unha serie de conclusións que posterioremente serán elaboradas e publicadas polo Consello da Cultura Galega nun informe.