O CONSELLO DA CULTURA GALEGA ELIXE PRESIDENTE MAÑÁ NUN PLENO EXTRAORDINARIO

A elección da persoa chamada a substituír a Carlos Casares a fronte da presidencia do Consello da Cultura Galega está previsto que teña lugar mañá, mércores 17 de abril de 2002, a partir das 18,30 horas, a través dun pleno extraordinario que foi convocado a estes efectos. A esta reunión de carácter extraordinario asistirán os membros do plenario para proceder a designar ó presidente, un nomeamento que non será oficial ata que así quede refrendado coa súa publicación no Diario Oficial de Galicia.
Conéctate co Consello da Cultura Galega en Facebook, Twitter ou comparte esta nova:

A orde do día deste pleno extraordinario consta de dous puntos. O primeiro será a aprobación dunha declaración institucional na que se fará público novamente o pesar deste organismo polo pasamento o pasado 9 de marzo de D. Carlos Casares Mouriño, rendéndolle así unha sentida homenaxe como presidente do CCG e persoa que traballou en prol da cultura galega.

Aprobada dita declaración, procederase á votación para designar ó novo presidente, votación secreta e para a que só será necesario acadar unha maioría sinxela. Feita a votación e designado o presidente, o secretario do Consello da Cultura Galega, Henrique Monteagudo, ofrecerá unha rolda de prensa aberta ós medios de comunicación na que fará lectura da acta levantada tralo peche do pleno extraordinario.