OS NOVOS XEITOS DE COMUNICAR CULTURA CENTRAN UN ENCONTRO QUE SE DESENVOLVE MAÑÁ NO CCG

A especialización xornalística no eido da información cultural e a necesidade de establecer novas propostas para o tratamento deste tipo de información son algunhas das liñas de debate que se pretenden abrir durante o encontro A información cultural en Galicia: algunhas ideas para un cambio, que terá lugar mañá, martes, 30 de abril no Consello da Cultura Galega. Á xornada inaugurarase a partir das 10 horas e contará coa participación do Director Xeral de Comunicación, José Ignacio Otero, o decano da Facultade de Xornalismo, Xosé López, así como o presidente do Consello da Cultura Galega, Alfonso Zulueta de Haz.
Conéctate co Consello da Cultura Galega en Facebook, Twitter ou comparte esta nova:

A Sección de Comunicación do CCG é a encargada de organizar este encontro dirixido a aqueles xornalistas que se enfrontan diariamente á necesidade de atopar novos xeitos de comunicar a cultura, tentando analizar e fornecer os lazos de mútua dependencia que xa unen á cultura cos medios de comunicación. Este achegamento cara ó tratamento da información cutlural farase desde unha triple óptica multidisciplinar representada por distintos persoeiros do mundo académico, profesionais dos medios e as propias fontes da información cultural.

A necesidade crecente de novos formatos, novos soportes e, sobre todo, novos xeitos de comunicar, de contar as distintas manifestacións culturais será outro dos ámbitos nos que se pretederá pescudar neste encontro que vén marcado pola necesidade cada vez máis urxente de adaptarse a unha sociedade cambiante.

Novas propostas
Os escritores e xornalistas, Carlos G. Reigosa, Manuel Rivas, Ramón Chao, así como as responsables de programas culturais como Metrópolis ou El Ojo Crítico, Alina Iraizoz e Paz Ramos, respectivamente, serán algúns dos participantes do encontro no que tamén se presentará o informe A cultura na prensa diaria galega elaborado por Montse Calvo e Xosé López, membro e coordinador, respectivamente, da Sección de Comunicación do Consello da Cultura Galega.

Esta xornada en torno á información cultural pecharase cun debate moderado por Víctor F. Freixanes co que se pretenden abordar distintas propostas para unha información especializada cultural de calidade. A mesa de debate contará coa participación de Juan Antonio García Galindo, Francisco Esteve e Javier Fernández del Moral.