Ambos son traballos de seguimentos "que non pretenden esgotar liñas de investigación senón ofrecer puntos de vista, que non son únicos, e cos que se pode abrir un debate que, ó fin, é o obxectivo da Sección de Comunicación", asegurou o coordinador de ambas publicacións e responsable da Sección de Comunicación do CCG, Xosé López. López fixo fincapé na importancia de facer este tipo de radiografías cada certo tempo, como un xeito de coñecer o funcionamento do sistema de comunicación galego e que permiten ver "os pasos que se dan para construír un espacio galego de comunicación".

Eleccións 21-O
No caso concreto da Revista de Estudios de Comunicación, este segundo número céntrase nas recentes eleccións autonómicas do 21-O, comicios que foron analizados no seu tratamento informativo na prensa, radio, Internet e televisión. A Revista complétase co outros artigos de xornalistas e membros da sección de Comunicación. Do mesmo xeito, outro cadro de expertos e académicos ocupan as páxinas da "Comunicación en Galicia 2002". As liñas xerais que definen a evolución da radio, a prensa, o cine, os medios de comunicación electrónicos, as condicións laborais dos xornalistas, as estratexias de mercadotecnia ou a dirección artística son algunhas das análises que ofrecen algúns dos asinantes do informe como son Domingo Docampo, Francisco Campos, Miguel Anxo Fernández ou Margarita Ledo, entre outros.

A Sección de Comunicación do Consello da Cultura Galega leva desde 1993 elaborando este tipo de traballos, o primeiro dos cales estivo coordinado por Manuel Rivas e Xosé López. A partir de entón a Sección considerou necesario elaborar estes seguimentos como medio de analizar periodicamente a evolución do sector, contribuíndo a un mellor coñecemento dos medios de comunicación en Galicia.

Máis información:
A Revista de Estudios de Comunicación, nº 1 pódese descargar en formato PDF desde a web oficial do Consello da Cultura Galega.