Os relatorios comezaron cunha exposición do catedrático Josep María Montaner, que fixo un repaso da obra das últimas décadas en Cataluña e que comezou criticando que nesa Comunidade, a pesares da súa producción creativa, non se produzan foros de debate e intercambio de coñecementos como estas Xornadas. Neste repaso xeracional, Montaner destacou que a arquitectura catalana non só está formada polos nomes consagrados, senón tamén por aqueles profesionais que cada día intentan abrirse camiño participando en exposicións, interiorismo ou intervencións efémeras.
Pola súa banda, o arquitecto e profesor Jordi Badía, do Estudio BAAS, expuxo algúns dos proxectos máis destacados nos que participou ou participa actualmente, entre os que destacan dous tanatorios de León e Tarrasa e que puxo como exemplo de que a obra non se pode desentender do lugar onde se empraza, da súa cultura.
Para rematar a sesión da mañá, o tamén profesor e arquitecto Helio Piñón, abordou a arquitectura dende o "material" que ofrece a experiencia, neste caso máis de trinta anos de exercicio profesional. Así, destacou que a gran arquitectura do último século non están baseada na experimentación e na innovación, senón na experiencia e na calidade. Na súa opinión, a experimentación "non se pode facer co diñeiro da xente ou das Administracións públicas".Xa pola tarde, o arquitecto Federico Correa fará balance dos seus cincuenta anos de práctica profesional na arquitectura e Josep Llinás abordará a súa obra recente. Para rematar a xornada, realizarase unha mesa redonda na que os participantes poderán debatir sobre os prantexamentos e as obras manexadas durante todo o día.
Mañá venres, día 28, as xornadas continuarán ás 10:30 cos relatorios "Arquitectura para o cambio", de Ignacio Paricio, e "Cataluña: outras arquitecturas", de Carlos Martí. Antonio Armesto, con "Apuntes sobre o valor da experiencia na arquitectura catalana", Carles Ferrater, con "3 3 3 -1", e Carmen Pigem, co relatorio "Cristalizacións", completarán esta ambiciosa perspectiva global e interxeneracional da arquitectura catalana.
Estas xornadas celébranse dentro dun ciclo dedicado a ofrecer unha visión global da arquitectura de Galicia e doutros focos peninsulares de especial significación. En maio o Consello acolleu a celebración das xornadas "A Arquitectura Lisboeta" e no futuro continuarase o ciclo con encontros sobre a arquitectura en Euskadi e Navarra, Andalucía e Castela e León. Da confrontación do coñecemento da arquitectura galega e destas Comunidades elaborarase unha publicación.