----

Máis de catrocentas voces soaron en Bonaval-Compostela na xornada “NO BICO UN CANTAR. NENOS E NENAS CANTAN A ROSALÍA”

Foi un concerto único, cálido e particularmente emotivo arredor da figura de Rosalía de Castro. O Consello da Cultura Galega e a Consellería de Cultura da Xunta de Galicia, xunto coa Fundación Cidade da Cultura de Galicia, organizaron a xornada “No bico un cantar. Nenos e nenas cantan a Rosalía” celebrada esta tarde nunha ateigada igrexa de San Domingos de Bonaval en Santiago de Compostela. Máis de catrocentos nenos e nenas de 8 a 12 anos dos centros de ensino musical (conservatorios, escolas municipais e coros infantís) cantaron os poemas “Maio longo”, “Rosa de abril”, “En Cornes” e “Negra sombra”, acompañados polo grupo de metais “Hércules Brass” e dirixidos por Maximino Zumalave. A xornada veu sumarse aos actos conmemorativos do 150 aniversario da publicación de “Cantares gallegos” (1863). Pola mañá os nenos e nenas participantes visitaron a Cidade da Cultura, onde realizaron o ensaio xeral. O concerto debía celebrarse na Praza da Quintana, mais as previsións meteorolóxicas aconsellaron levalo a Bonaval fuxindo da chuvia que, cumpridora da predicción, non faltou á cita.
Máis de catrocentas voces soaron en Bonaval-Compostela na xornada “NO BICO UN CANTAR

A uns poucos metros do sartego onde, no Panteón de Galegos Ilustres, repousa Rosalía de Castro (1837-1885) os nenos e nenas cantores, dirixidos pola batuta de Maximino Zumalave e acompañados polo grupo de metais "Hércules Brass" (dous cornos, dúas trompetas, trombón e tuba), puxeron o seu saber e a súa emoción para converter en fermosas cantigas catro poemas escritos pola máis úniversal escritora galega. A escolla incluiu dous poemas de “Cantares gallegos”: “Rosa de abril” (partitura de Andrés Gaos) e “En Cornes” (partitura de Octavio Vázquez) e dous de “Follas novas”: “Maio longo” (partitura de José Baldomir) e “Negra sombra” (partitura de Juan Montes).

O acto foi presentado e conducido pola escritora Fina Casalderrey e acolleu tamén as intervencións de Rosario Álvarez, vicepresidenta do Consello da Cultura Galega, e de Xesús Vázquez Abad, conselleiro de Cultura, Educación e Ordenación Universitaria da Xunta de Galicia.

Á igrexa de San Domingos de Bonaval acudiron asemade o presidente da Real Academia Galega, Xesús Alonso Montero; o Secretario Xeral de Cultura, Anxo Lorenzo; o vicepresidente do Consello da Cultura Galega, Francisco Díaz-Fierros, e a Xerente da Cidade da Cultura de Galicia, Beatriz González Loroño, entre outras autoridades e representacións.

Outros datos e e as partituras da xornada “No bico un cantar. Nenos e nenas cantan a Rosalía” poden descargarse en: http://www.consellodacultura.org/rosalia2013/nenos_rosalia.php