Sostivo a investigadora italiana que as identidades, individuais e colectivas, están profundamente determinadas pola memoria do propio pasado e pola complexa dinámica que nelas xoga a dialéctica do recordo e do esquecemento. Nesa perspectiva un rol importante está representado polos chamados ‘lugares da memoria’ -mausoleos, monumentos, memoriais, museos- dedicados ao recordo do pasado. Eses lugares, afirma Patrizia Violi, “que exteriorizan no espazo a temporalidade da historia pasada, son lugares-tópicos cruciais na constitución das identidades colectivas e das súas proxeccións no futuro, e a súa análise é un compoñente esencial para unha semiótica das identidades culturais. “O modo en que a memoria do pasado traumático é conservada e novamente proposta está directamente en función dunha idea da identidade futura que se quere construir”. Ou sexa, engadiu Patrizia Violi, que é o futuro o que guía a memoria do pasado, o recordo do trauma, a súa elaboración ou a súa remoción e cancelación”.
“O(s) Sentido(s) da(s) Cultura(s)” é un seminario interdisciplinar sobre os significados da cultura no tempo presente, que o Consello da Cultura Galega vén organizando dende 2006. Coordinado polo profesor Ramón Máiz, ten como obxectivo abordar os debates e investigacións recentes sobre as plurais nocións e prácticas da Cultura en ámbitos como a Filosofía, a Antropoloxía, a Arte, a xestión cultural, os estudos culturais, as políticas do multiculturalismo, etc.