Comezan as xornadas Arte+Pintura que ofrecerán un mapa da situación pictórica

Este mércores arrincan no Consello da Cultura Galega as xornadas “Arte+Pintura”, que buscan ofrecer un mapa teórico e práctico do estado actual deste xénero. “Aínda que se leva dicindo que a pintura esmorece, o que imos poder ofrecer é que existe unha gran diversidade e riqueza, así como exhibir a enerxía que ten a pintura a día de hoxe” explica Almudena Fernández, coordinadora xunto con María Luisa Sobrino das xornadas que se desenvolverán ata o xoves na sede da institución.
Conéctate co Consello da Cultura Galega en Facebook, Twitter ou comparte esta nova:

As xornadas queren reflexionar, repensar e analizar como os cambios repercuten na práctica artística. Profesores, comisarios e investigadores ofrecerán un achegamento á situación actual da pintura desde un punto de vista teórico en sesión de mañá, mentres que pola tarde serán os propios creadores os que, exhibindo o seu traballo, irán amosando como se concretan todos os cambios que a pintura leva asumindo nos últimos tempos. “A aparición de internet, das redes sociais e a popularización dos programas de deseño gráfico de manipulación da imaxe que foron claves para a transformación que sufriu a pintura” explica Almudena Fernández.

Un gran mapa actual da pintura
Non é a primeira vez que o Consello da Cultura reflexiona sobre a pintura. A primeira vez fíxoo no ano 1995, nunhas xornadas organizadas por Antón Castro e Juan de Nieves. “Daquela celebráronse moitas exposicións referenciais sobre a pintura, nas que se defendía que a tradición pictórica non esmorecera, pero tamén foi o momento no que empezan a ser borrosas as liñas das grandes categorías artísticas como a pintura, a escultura…” puntualiza Almudena Fernández, membro da sección de Creación e Artes Visuais Contemporáneas do Consello da Cultura Galega e profesora da Facultade de Belas Artes (Universidade de Vigo). Foi na década seguinte, cando comezan a asimilar e consolidar eses cambios que outros xéneros, como a escultura, aceptaron moito antes. As xornadas evidenciarán esa transformación tanto na representación como nos materiais e nos soportes. “O que nos gustaría que quedase, explica Almudena Fernández, é un mapa da gran diversidade e da gran riqueza e enerxía que aínda ten a pintura”.

Para explicar esa transformación, as xornadas contan neste primeiro día coa presenza destacada de Antón Castro, que ofrecerá a evolución con respecto da década dos noventa. Canda el, a profesora da Universidade de Lisboa, Isabel Sabino, explicará porque se inclúen outras disciplinas na pintura como poden ser a fotografía, as performances ou o teatro, e por que se deconstrúe o espazo pictórico, cuestión que ten amplamente abordadas no libro “A pintura depois da pintura”.

Xa pola tarde, será o momento dos creadores. Berta Cáccamo, Miren Doiz e Manuel Eirís, moderados polo profesor e tamén artista visual, Ánxel Huete debaterán “Dentro ou fóra do cadro” para concretar como se materializan eses cambios.

A sección de Creación e Artes Visuais Contemporáneas
María Luisa Sobrino é a coordinadora da sección de artes Visuais e de Creación Contemporánea do Consello da Cultura Galega, integrada por artistas, críticos e xornalistas entre os que destaca Natalia Poncela, Chus Martinez, Camilo Franco ou Miguel Anxo Prado. O proxecto máis recente desenvolvido por esa sección é Arte+Mulleres. Informe da situación I, centrado na análise da visibilización das artistas no eido das artes visuais en Galicia, desde 1990 ata 2013. Canda este, destaca a plataforma web ATALAIA. Arte contemporánea en Galicia que veu a luz en 2010 e que consiste nunha base de datos, directorio e centro de recursos para coñecer aos artistas, as obras, os eventos, as publicacións e as entidades vinculadas á arte contemporánea en Galicia. Ademais, no marco do Álbum de Mulleres, iniciativa da Comisión de Igualdade do Consello da Cultura Galega, desenvolveron un apartado específico de Artistas visuais galegas

Outras noticias que te poden interesar: