“Obras coma esta encaixan nas liñas estratéxicas de traballo do Consello da Cultura como son a de establecer parcerías con outras institucións e a de contribuír a editar textos con metodoloxías científicas que tratan de explicar un problema” apuntou o presidente Ramón Villares na presentación. Canda el, Xulio Sousa,un dos editores, situou o volume no seu contexto ao apuntar que “é o desenvolvemento escrito dun simposio celebrado en 2013 coa intención de abordar desde un marco multidisciplinar a fronteira galego-portuguesa”. Na súa opinión serve tamén para “revisar algúns tópicos” desde o punto de vista histórico, antropolóxico ou lingüístico. Son dez contribucións que reflexionan sobre as razóns e as consecuencias da división en dous do espazo constitutivo do protorromance galego, e que deu lugar ás linguas galega e portuguesa.
A variación sintáctica, o léxico dialectal, a entoación e as percepcións así como as actitudes lingüísticas na fronteira galego-portuguesa son algúns dos temas tratados no volume. Nel tamén se analizan os camiños diverxentes de Galicia e Portugal a partir da Idade Media ou a permeabilidade bidireccional da raia, que a un tempo une e separa ambos os territorios.
Xulio Sousa, Marta Negro Romero e Rosario Álvarez son os tres investigadores encargados da edición desta monografía que ve a luz no marco da colección «Ensaio&Investigación» do Consello da Cultura Galega.
Unha reflexión e varias homenaxes
Mediante esta monografía preténdese propiciar a reflexión sobre o estado da cuestión, impulsar avances na súa investigación, crear un espazo de encontro para as olladas pluridisciplinares e crear novo coñecemento con renovación en métodos e resultados. O volume, dedicado a William Kavanagh (1947-2014), estudoso do significado e relevancia das fronteiras que finou pouco antes da publicación desta obra, reúne dez contribucións orixinais de catorce especialistas, nunha tripla perspectiva: histórica, antropolóxica e lingüística.
Ademais, esta homenaxe publicouse nun momento no que se cumpren dúas efemérides, o 75 aniversario da publicación do traballo de Hans Schneider sobre o galego raiano na Limia baixa, unha obra de referencia da dialectoloxía galega e o 150 aniversario da fixación definitiva do trazado da raia seca. Esta publicación, editada polo Consello da Cultura Galega, toma como base o simposio homónimo que se desenvolveu en Santiago entre o 28 de novembro e o 3 de decembro de 2013.
O simposio e a monografía
Esta publicación hoxe presentada responde a unha dinámica de traballo iniciada hai uns anos entre o Consello da Cultura Galega e o Instituto da Lingua Galega. Ernesto González, director do ILG, explicou na rolda que desde 2001 esta entidade organiza anualmente un simposio cun triplo obxectivo: describir un estado da cuestión arredor dun tema, conectar as investigacións científicas lingüísticas con outras que se estean a facer tanto no país como fóra, e impulsar unha nova liña de investigación. Sobre os traballos presentados nese simposio anual, pero enriquecidos co debate e unha posterior reflexión, elabórase unha monografía de cuxa edición se encarga o Consello da Cultura Galega.
Descarga na mediateca a publicación