Desde o martes 3 ata o sábado 7 de marzo, nas salas do CGAI terán lugar proxeccións diarias (con entada de balde ata completar aforo) encamiñadas a exhibir filmes feitos ou protagonizados por mulleres. A cita arrinca co único título de directores masculinos, Dos días, una noche, dos irmáns Dardenne. Esta produción recolle a situación da muller no ámbito laboral nun contexto de crise. A intérprete principal, Marion Cotillard, foi candidata ao Oscar á mellor actriz polo seu papel de traballadora que intenta que os seus compañeiros renuncien á paga extraordinaria para ela conservar o seu posto na empresa.

As proxeccións continúan o mércores 4 con Mil noches, una boda, de Marie Amachoukeli-Barsacq, Claire Burger e Samuel Theis. Neste filme abórdase o retrato dunha muller libre de 60 anos e as complexidades dos afectos e a contorna social. Canda este título, Amour fou, de Jessica Hausner, está inspirada na historia do poeta Heinrich von Kleist e a súa procura dunha compañeira para se suicidar en pleno Romanticismo alemán; ambas as dúas achegan senllos retratos femininos con forza.

A creación galega
Para os últimos días do ciclo resérvase a sección Creadoras Galegas de Imaxe, na que se ofrecen dous títulos de carácter galego. Un deles é Muller(es)Muller, de Inés Pintor, producido por SocialDocs e no que se amosa a vida de mulleres dunha mesma familia pertencentes a tres xeracións distintas: as dificultades e diferenzas na educación, na percepción, no papel desempeñado… O outro é O tesouro de Corcoesto, adscrito ao documental militante e dirixido pola galega Cora Peña.
O ciclo remata con Se dice poeta, da asturiana Sofía Castañón, que se aproxima a 21 poetas, entre elas tres galegas establecidas na Coruña: Yolanda Castaño, Estíbaliz Espinosa e María Couceiro.
No marco desta sección, tras o remate das proxeccións programadas terá lugar un coloquio-debate coa presenza das autoras dos filmes.