Unha xornada do Consello da Cultura reclama unha maior integración das artes escénicas no currículo educativo

Hai moitas maneiras de achegar o teatro aos máis novos nun ámbito escolar. Hai quen usa o teatro para instruír nos contidos das materias de clase, e quen o emprega como un divertimento. Todas as opcións, así como as súas vantaxes, quedaron de manifestou na xornada “Teatro amador na infancia e na mocidade”. A cita que se desenvolveu ao longo da xornada de hoxe no Consello da Cultura Galega incidiu na relación entre a educación e a cultura pero, sobre todo, puxo de manifesto o papel central das artes escénicas na formación e a necesidade de que exista unha maior integración destas no currículo educativo.
Unha xornada do Consello da Cultura reclama unha maior integración das artes escénicas no currículo educativo

Hai moitas maneiras de achegar o teatro aos máis novos nun ámbito escolar. Hai quen usa o teatro para instruír nos contidos das materias de clase, e quen o emprega como un divertimento. Todas as opcións, así como as súas vantaxes, quedaron de manifestou na xornada “Teatro amador na infancia e na mocidade”. A cita que se desenvolveu ao longo da xornada de hoxe no Consello da Cultura Galega incidiu na relación entre a educación e a cultura pero, sobre todo, puxo de manifesto o papel central das artes escénicas na formación e a necesidade de que exista unha maior integración destas no currículo educativo.

A cita organizada pola Sección de Música e Artes Escénicas do Consello da Cultura Galega estaba coordinada por Inma Lopez Silva e Euloxio Ruibal. Nela pretendían recoller o facho acendido nunha xornada semellante hai dous anos sobre o teatro amador e que agora centraba o enfoque no ámbito escolar. Nesta ocasión, a cita construíase arredor de tres mesas redondas con diferentes con diferentes puntos de vista. Abriu a xornada Asun Sólvora, unha profesora que achegou un relatorio no que demostrou como era posible conseguir un auténtico festival escolar como é a Mostra de Teatro do Ensino Secundario do Morrazo. Ánxela Doval, profesora nun centro en Porto do Son, achegou outra posibilidade, como é o uso de estratexias e técnicas teatrais para achegar os contidos da materia de Educación para a cidadanía. A primeira mesa rematou con Ángeles Abelleira, quen ofreceu outro punto de vista diferente, o dunha mestra de infantil (de 3 a 6 anos) que traballa desde o teatro.

A xornada da mañá completouse coa revisión de experiencias que abordan o teatro como actividade extracurricular. Artur Trillo contou o caso da Escola Municipal de Teatro de Cee que xestiona a compañía Talía Teatro. Xesús Ron, de Chévere, detallou as iniciativas que esta compañía leva desenvolvido desde a súa experiencia na Sala Nasa e como residencia en Teo. Pechou a mesa Pilar López coordinadora do proxecto KunArte de Euskadi.

Xa pola tarde, Manuel F. Vieites, director da Escola Superior de Arte Dramático de Galicia(ESAD) destacou a necesidade de que o teatro non sexa considerado como un valor educativo especial, senón como unha ferramenta máis. Defendeu a necesidade de “aprender facendo” e insistiu na idea de que hai que integrar a expresión dramática e teatral dentro do currículo educativo. Na súa opinión, non hai que poñer o énfase en facer espectadores, senón creadores que acabarán por converterse tamén en creadores. Paula Carballeira, directora e actriz da compañía Berrobambán explicou a súa experiencia persoal e como autora neste ámbito. Pechou as exposicións Concepción Largo, coordinadora de Actividades Educativas e Culturais do Centro Dramático Nacional (CDN), quen debullou as actividades desenvolvidas polo CDN desde hai once anos: visitas guiadas, a elaboración de cadernos pedagóxicos e coloquios cos actores; así como unha política de prezos máis reducida para grupos escolares.

Outras noticias que che poden interesar