NOTICIA

----

O Consello da Cultura Galega destaca a colaboración cidadá como un factor estratéxico para as institucións da memoria

As institucións da memoria (bibliotecas, arquivos e museos) deben “adaptarse aos retos e aproveitar as oportunidades” que ofrece o paradigma dixital no que conviven, especialmente a “colaboración aberta” cos cidadáns, que pode contribuir a mellorar a relación entre institucións e cidadanía. Así o aseguran os coordinadores no documento de conclusións do encontro “O patrimonio común? Colaboración aberta e institucións da memoria” , que hoxe rematou no Consello da Cultura Galega.
Conectate o Consello da Cultura Galega en Facebook, Twitter ou comparte esta nova:

O encontro, organizado pola Sección de Patrimonio e Bens Culturais do Consello da Cultura Galega, estivo coordinado por Bieito Pérez Outeiriño, Gabriel Quiroga Barro e Concepción Varela Orol. Os coordinadores constatan que: “a esencia da colaboración aberta non se acha na mera substitución de tarefas técncias, senón que constitúe unha nova forma de achegar coñecemento a esas institucións”. Asímesmo, destacaron que na actualidade “moitas das experiencias de éxito internacional de colaboración aberta xurden de iniciativas da propia cidadanía ou de sectores externos ás institucións da memoria” e, polo tanto, é preciso decatarse de que “a colaboración aberta constitúe un factor estratéxico para a súa xestión, ao2 contribuír a mellorar a súa relación coa cidadanía e a súa credibilidade”. Os coordinadores tamén resaltaron que cumpría aproveitar as ferramentas dispoñibles na rede libremente para reducir custes e conseguir a máxima eficiencia e eficacia”.

As xornadas contaron coa participación de expertos e profesionais involucrados en proxectos e procesos participativos documentais de todo o Estado. Estes son Eugenia Serra (Biblioteca de Catalunya), M.Luz Retuerta (Arxiu Comarcal del Baix Llobregat), Carolina García Borrazás e Teresa García Domínguez (Arquivo de Emigración do CCG), Anabella Barroso Arahuete (Arquivo Histórico Eclesiástico de Bizkaia), Pere Freixa (Universitat Pompeu Fabra), Tomás Saorín (Universidad de Murcia, Wikimedia España), Manuel Gago (Consello da Cultura Galega), Adelaida Ferrer (Biblioteca Universidad de Barcelona) e Covadonga Pitarch (Museo Sorolla).