A cita pretende coñecer cal é o papel que o feminismo ou a perspectiva de xénero ocupa nos arquivos públicos de Galicia desde tres niveis: o primeiro desde os profesionais que traballan nel, para o que estará Beatriz Díaz Vázquez, arquiveira e directora do Arquivo Municipal de Oleiros; o segundo, desde a presenza da muller nos fondos, do que falará Eva García Amador, antropóloga e restauradora no Arquivo do Reino de Galicia; e o terceiro, desde os procesos de traballo e da visibilidade das mulleres, que analizará Olimpia López, que presta servizos no Arquivo Territorial da Xunta.
A perspectiva estatal chega da man de Luis Martínez García, arquiveiro, coordinador xeral de Arquivos e director do Arquivo de Castela–A Mancha, que fará un repaso cronolóxico desde o inicio do século XX ata o presente. Ademais, no transcurso da xornada expoñerase o caso concreto do “Archivo Mujeres y Géneros del Archivo Nacional de Chile”, que é unha referencia internacional na materia. Para iso estará presente a súa encargada, Francisca Marticorena.
Todos os relatores participarán nunha mesa redonda previa á clausura, que correrá a cargo da coordinadora, Dolores Pereira. Ademais, os relatorios da xornada xa se poden consultar no web do Consello da Cultura Galega, desde o que se retransmitirá a xornada en directo.
As xornadas Xénero e Documentación
Desde o ano 2007, a Comisión de Igualdade do Consello da Cultura Galega realiza periodicamente unhas xornadas baixo o título “Xénero e Documentación” co obxectivo de pór a disposición do público información arredor desta materia. Na primeira edición editouse unha publicación dixital en CD que fixo unha achega ao tratamento documental. En 2012 tivo lugar a segunda edición, que ampliou o seu foco de actuación ao resto de España para coñecer a documentación (recuperación, conservación, posta en valor e difusión) producida por organizacións de mulleres en agrupacións autónomas e mixtas identificadas co feminismo. Nesta cita presentouse a colección especial “Recuperación da documentación e memoria do Movemento Feminista Organizado en Galicia” do Consello da Cultura Galega.