O Consello da Cultura Galega e o Concello de Pontevedra rememoran o concerto homenaxe a Perfecto Feijoo cen anos despois

A praza da Ferraria acolleu este sábado un gran concerto que xuntou aos catro coros históricos que permanecen activos: Coral de Ruada de Ourense, Cántigas da Terra da Coruña, o Real Coro Toxos e Froles de Ferrol e Cantigas de Agarimos de Santiago. Asistiron a presidenta do Consello da Cultura Galega, Rosario Álvarez, e a concelleira de festas, Carme da Silva, que foron as dúas entidades que organizaron esta actividade. O acto rememorou o concerto que estas formacións (agás Cantigas e Agarimos, creada en 1921) celebraron hai cen anos para render homenaxe a Perfecto Feijoo, fundador do xa desaparecido coro Aires da Terra (1983-1914) de Pontevedra.
Conéctate co Consello da Cultura Galega en Facebook, Twitter ou comparte esta nova:

Perfecto Feijoo Poncet (Pontevedra, 1858 -1935) foi un farmacéutico, gaiteiro e musicólogo galego. Fundou na súa cidade natal o coro de Aires da Terra, que foi o espello no que se miraron as formacións corais que se fundaron despois. A historia destas formacións e a súa contribución á cultura galega pódense ver na exposición “Son de Galicia” que o Consello da Cultura Galega realizou e estará aberta ata o día 5 de setembro na Casa das Campás en Pontevedra.