O cancioneiro de Oencia incorpórase ao Mapa Sonoro de Galicia

Son preto de trescentas pezas nas que hai romances, milicias, cregos, seituras, berces, parrafeos e outros cantares xunto con contos e relatos que revelan a diversidade cultural do concello de Oencia (León), considerado tradicionalmente como un dos 48 concellos da Galicia estremeira. O traballo de recolleita deste patrimonio oral foi realizado por Xosé Lois Foxo e agora incorpórase ao Mapa Sonoro de Galicia.
Conéctate co Consello da Cultura Galega en Facebook, Twitter ou comparte esta nova:

Esta nova achega inclúe 295 pezas recollidas no ano 2013 por Xosé Lois Foxo nun proxecto que pretendía dar conta da rica tradición de Oencia, concello limítrofe entre Galicia e León. Constitúe un cancioneiro de moi distintos xéneros que contribúe a enriquecer o proxecto do Mapa Sonoro de Galicia. Inclúe cantares de ronda, varios, romances, milicia, cregos, seitura, berce, parrafeos, brindos ou loias de voda, pastores, reis, ramos e relixiosos; repertorio dos gaiteiros da zona e unha sección de contos e relatos. “Esta é a mellor homenaxe que podemos ofrecer ás xentes que mantiveron esta xoia do patrimonio inmaterial e intanxible”, apuntou Xosé Lois Foxo na publicación editada polas deputacións de Ourense e de León.

Mapa Sonoro de Galicia
O Mapa Sonoro de Galicia é un proxecto do Consello da Cultura Galega que pretende difundir o patrimonio sonoro a través da xeolocalización de coleccións sonoras xa custodiadas pola institución ou por outras entidades e particulares. Está especializado en coleccións de recollida antropolóxica, etnográfica, lingüística, ou de sons da natureza, ambiente ou de actividade humana.

A día de hoxe, o Mapa Sonoro de Galicia subiu á rede 901 documentos sonoros de coleccións moi diversas debidamente xeolocalizados. Entre esas coleccións están: “A cultura popular de tradición oral nos centros da terceira idade”, que recolle lendas, contos populares e gravacións dos nosos maiores; “A nosa fala”, que permite coñecer e diferenciar as variedades dialectais da lingua galega; “Auga doce: viaxe sonora polo río Miño”, na que se recollen os sons do gran río de Galicia, desde o paso natural do río ata as accións humanas vinculadas a el; “Sons da terra”, que permite escoitar sons da natureza pero tamén de oficios xa desaparecidos, e o “Cancioneiro Antropolóxico”, que recolle os cantares e a tradición musical das montañas do Lor e as terras de Quiroga, en Lugo.



Accede ao Cancioneiro de Oencia