Subidos á rede cen novos números do semanario A Nosa Terra

A apertura da V lexislatura no Parlamento Galego en novembro de 1997 ocupa a portada do número 805 do semanario A Nosa Terra. A guerra de Irak, a supertaxa láctea, e novos sismos nos Ancares son outros dos temas do xornal dese día e que se poden consultar na novena entrega da difusión do fondo dixitalizado desta cabeceira. Trátase do proxecto do Consello da Cultura Galega que pon a disposición dos usuarios e usuarias un xornal que é clave para comprender a historia recente de Galicia.
Conéctate co Consello da Cultura Galega en Facebook, Twitter ou comparte esta nova:

Con esta entrega poderemos ver os números publicados entre os anos 1995 e 1997 que nos permite coñecer os temas da actualidade do momento. O estudo do Consello da Cultura Galega sobre as preferencias do público da publicidade en galego; o debate sobre o papel das nacionalidades históricas nas negociacións previas á investidura de Aznar; as cifras de paro... son algúns dos temas que se poden consultar grazas a esta iniciativa.

Proxecto de dixitalización
En 2018 o Consello da Cultura Galega e a fundación A Nosa Terra asinaron un acordo que fixa a cesión provisional do fondo deste xornal para a dixitalización e a súa posta a disposición pública e gratuíta a través do web institucional do CCG. A nosa terra é un periódico galego semanal iniciou a súa andaina o dous de decembro de 1977 e rematou en 2011, cubrindo cun estilo xornalístico singular a actualidade política, económica, social e cultural de Galicia a través de contidos de longo alento. Este semanario é unha fonte fundamental para comprender a transición e os inicios da autonomía galega.

A Nosa Terra