“É preciso afianzar o mecenado como un servizo que garanta o dereito á cultura, á equidade, e mais a complementariedade no financiamento da cultura, e tamén como prestador de servizos, apoio ou asesoramento” fixa unha das dez conclusións dun documento asinado por María Xosé Porteiro e Fran Quiroga, que está encamiñado a mellorar a acción do mecenado en Galicia. Entre as medidas propón aumentar a información para superar as desconfianzas, visibilizar o papel e as vantaxes así como aumentar a transparencia, rendición de contas e a gobernanza. Ademais, propón delimitar os lindes entre patrocinio e mecenado, e apostar por unha administración proactiva que busque e fomente o uso deste recurso para redistribuír e ampliar o número de benfeitores. Para iso, suxire un marco lexislativo favorable e que entenda os seus beneficios máis alá do económico. Tamén recomenda a realización dun segundo encontro dirixido a buscar solución e propostas perante a próxima celebración do Xacobeo 2021.

O pasado 4 de febreiro o Consello da Cultura Galega organizou unha xornada que pretendía facer un balance da cuestión sobre este tema en Galicia. A cita permitiu coñecer a situación de entidades creadas en Galicia, como a Fundación Barrié ou a Fundación RIA, da man dos seus responsables, José Manuel Arias e David Chipperfield, respectivamente; así como de entidades como a Fundación Daniel y Nina Casasso, creada polo fundador de Danone, que están a desenvolver actividades en Galicia. Os vídeos de todas as intervencións desta cita e mais o documento de conclusións xa están dispoñibles desde a páxina web da institución.