O nobelo de Mabel Rivera

O especial O fío de Penélope condúcenos do fío de Ariadna ao nobelo de Penélope. Once mulleres fan cadanseu periplo polos contidos do web do Consello da Cultura Galega a partir das mulleres homenaxeadas en xornadas organizadas dende o Centro de Documentación en Igualdade e Feminismos do CCG. Como non podía ser doutro xeito, non tiran guiadiñas dun fío establecido, senón que cuestionan o nobelo de Penélope, tal e como fixo no seu día a poeta Xohana Torres nos seus recoñecidos versos: “A que tanto nobelo e tanta historia? Eu tamén navegar”.
Esta é a travesía libre de Dolores Vilavedra da man de Mabel Rivera, referente da escena e do audiovisual galegos.



Dolores Vilavedra, profesora titular de Literatura Galega da Universidade de Santiago de Compostela e coordinadora da Sección de Artes Escénicas, Musicais e Audiovisuais do CCG, foi a coordinadora, xunto con
Inma López Silva, da xornada Escénicas. Mabel Rivera, realizada en 2013. A súa navegación lévanos por referencias vitais e profesionais que marcaron a súa traxectoria, o recordo de Roberto Vidal Bolaño, Rosa Álvarez e Marisa Soto, a súa preocupación pola formación e os estudos e o marcado compromiso cívico e reivindicativo dunha das actrices máis galardoadas da nosa escena e audiovisual. Para rematar, unha festiva homenaxe co convite a revisitar tres filmes pionerios no evento "30 anos do audiovisual galego" e un desexo: que teñamos Mabel Rivera para moitos anos.