A prestixiosa editorial Brill dá ao prelo o volume The First World War and the Nationality Question in Europe

The First World War and the Nationality Question in Europe é o título do volume que compila os traballos presentados no simposio “O contexto internacional das Irmandades da Fala e a cuestión de nacionalidade na Europa de entreguerras”, que organizou o Consello da Cultura Galega (CCG) en outubro de 2016. O volume, que edita a recoñecida editorial Brill, xa está dispoñible. O texto está en inglés e ten como coordinador ao historiador e actual vicepresidente da institución, Xosé Manoel Núñez Seixas

“Esta publicación é a culminación dos esforzos que fixo o Consello da Cultura Galega cando se sumou á celebración do centenario das Irmandades da Fala, entre os anos 1916 e 1918, en que abordou o fenómeno dunha maneira propia tratando aspectos que non estaban suficientemente cubertos” explica Xosé Manoel Núñez Seixas sobre a xénese deste número que ve hoxe a luz. Ademais dun artigo do propio Núñez Seixas, a publicación compila obras de historiadores, politólogos e lingüistas, entre os que figuran os nomes de Bence Bari, Stefan Berger, Miguel Cabo, Stefan Dyroff, Lourenzo Fernández Prieto, Johannes Kabatek, Joep Leerssen, Ramón Máiz, Malte Rolf, Ramón Villares e Francesca Zantedeschi.

O volume aborda o desenvolvemento político das nacionalidades en Europa durante a Primeira Guerra Mundial e as súas secuelas, cubrindo desenvolvementos e debates teóricos, sociais, mobilizacións e perspectivas culturais. Ademais, achégase ao tema desde diferentes escalas, mesturando a perspectiva global e transnacional coa vista desde abaixo, dende os contextos locais, con particular atención ás zonas periféricas.

Brill é unha editorial fundada en 1683 e destaca entre as máis prestixiosas en Humanidades e Ciencias Sociais, especialmente en Historia a nivel internacional. Ten a súa sede social en Leiden (Países Baixos) e oficinas en Boston (Estados Unidos), Paderborn (Alemaña), Singapur (Singapur) e Pequín (China).

A capa do volume inclúe unha das poucas imaxes de calidade que ilustran o movemento no noso país e retrata aos membros da Irmandade da Fala de Betanzos. A imaxe orixinal está depositada no Arquivo Municipal de Betanzos.

Tres congresos e dúas publicacións
Entre 2016 e 2018, coincidindo co centenario do período de nacemento e expansión das Irmandades da Fala, o Consello da Cultura Galega celebrou en Santiago de Compostela tres congresos para analizar, desde unha perspectiva comparada, este fenómeno. O primeiro deles titulábase “O contexto internacional das Irmandades da Fala. As nacionalidades na Europa de entreguerras: de imperios a nacións” e desenvolveuse entre o 6 e 7 de outubro de 2016. Entre o 18 e 19 de outubro de 2017 tivo lugar o segundo congreso internacional sobre as Irmandades da Fala co título “Cultura e política na España de entreguerras”. En 2018 rematou o ciclo cunha cita titulada “Nacionalismo galego e diáspora (1916-1936)”.

Este volume recolle as contribucións da primeira das citas, celebrada entre o 6 e o 8 de outubro de 2016. Algún dos textos que hoxe publica Brill aparecerán tamén na publicación que o Consello da Cultura Galega prepara para principios de 2021. Será entón cando se presente o texto “As irmandades da fala no seu tempo: perspectivas cruzadas”. Ramón Villares, Ramón Máiz e Xosé Manoel Núñez Seixas son os editores deste volume, que recolle tamén algúns dos relatorios do congreso de 2017, que encadrou o movemento na súa contorna, xunto cunha escolma dos textos da cita de 2018, que tratou as vinculacións transatlánticas das Irmandades da Fala coas comunidades galegas da diáspora.

Outras noticias que te poden interesar: