As condicións de iluminación solar do planeta varían ao longo do ano. E isto tamén fai que o punto do primeiro amencer ou do solpor tamén varíe. São Vicente e Cabo da Roca en Portugal, a Costa da Morte en Galicia e Aglapsvik e Måsøy en Noruega son os lugares nos que se produce este fenómeno. Esta especie de irmandade é o fío de unión dunha xornada que xunta especialistas de diferentes disciplinas para analizar as potencialidades turísticas destes espazos. Esta cita estaba prevista para se desenvolver o 24 de marzo de 2020 pero foi adiada por mor da pandemia.

Profesionais do ámbito científico e turístico analizan nos seus relatorios asuntos como a creación de produtos turísticos, de marcas e de iniciativas do ámbito do turismo científico. A cita arrinca cunha conferencia marco a cargo de Jorge Mira Pérez, profesor da Facultade de Física da Universidade de Santiago de Compostela (USC). Nela falará da busca dos puntos de último solpor da Europa Continental.
Despois, Xurxo Cegarra González, de Wireless Galicia, e Fernando Rey Daluz, de LuzLux, analizarán o caso práctico de creación de valor que se chama “Solpor Fisterra: da tecnoloxía á promoción turística”. Ademais, Maite Vence, directora de Observer Turismo Científico falara do desenvolvemento de ideas de turismo científico.

A xornada conta tamén cunha mesa redonda moderada por Santiago Garrido Rial, subdirector da delegación de La Voz de Galicia en Carballo, na que participan o propio Jorge Mira Pérez; Pablo Canosa Quintáns, secretario de Costa da Morte Asociación Turística; José Marcote, alcalde de Fisterra; Xosé Regueira, vicepresidente da Deputación da Coruña; máis Nava Castro, directora da Axencia de Turismo de Galicia.

Sección de Ciencia, Natureza, Tecnoloxía e Sociedade
A organización desta xornada insírese na liña de traballo da Sección de Ciencia, Natureza, Tecnoloxía e Sociedade, coordinada por Elena Vázquez Cendón. Entre as súas accións elaboran materiais e recursos didácticos como é o proxecto “Álbum da ciencia”, unha completa base de datos con biografías de científicos e científicas galegas, ou a publicación de varias bandas deseñadas. Nas súas actividades destacan informes como “A divulgación da ciencia en Galicia”, que compila a variedade e calidade de iniciativas que existen no noso país para a difusión do coñecemento científico. Ángel Carracedo, Jorge Mira, Xurxo Mariño ou Marilar Aleixandre son algúns dos membros desta sección.