Tras unha obrigada interrupción o ano pasado por motivos sanitarios, este 2021 o Galegote Rock volverá encher Pontevedra de música en galego. No marco desta iniciativa, promovida polo Servizo de Normalización Lingüística do Concello de Pontevedra co obxectivo de crear espazos de uso para o galego no ámbito do lecer, celebraranse 15 concertos durante os vindeiros días 28, 29 e 30 de maio. Os espectáculos terán lugar en dous espazos ao aire libre da cidade: nas escaleiras que baixan do parque das Palmeiras cara a Raíña Vitoria e no palco da música na Alameda. Podes consultar o programa completo do Galegote Rock 2021 premendo aquí.
