Xosé Baña Pose (Varilongo, Santa Comba, 1872- A Habana, 1945) foi un emigrante autodidacta, poeta popular e articulista. A súa sona como versificador continúa hoxe en día, onde algúns dos seus poemas seguen a ser lembrados entre a veciñanza de Xallas, Soneira e Bergantiños. Vindicación é unha miscelánea de textos con dúas partes ben diferenciadas. Na primeira, detense de maneira singular na biografía de Curros Enríquez, a quen o autor tratou, achegando detalles moi próximos sobre a vida do escritor e os seus conflitos cos dirixentes da colectividade galega de Cuba. Na segunda, onde aparecen os textos en lingua galega, os textos son un canto á súa terra, paisanos e toponimia, combinado cunha especie de autobiografía na que alterna diferentes tipos de documentos con poemas. O seu galego, segundo Henrique Costas, "ten vontade popular e é rico en matices" e presenta destacados trazos dialectais das comarcas do interior da provincia da Coruña.

Colección Clásicos da emigración

La emigración en Galicia publicada por Ramón Castro López en 1923 foi o punto de apertura dunha colección de libros que, baixo o título Clásicos da emigración, pretende ofrecer un reflexo fiel do que supuxo a emigración galega tanto para aqueles que a viviron desde os seus países de destino como para os que os viron marchar.

A colección está integrada por unha ducia de títulos de diferentes xéneros que hoxe en día son difíciles de atopar en bibliotecas ou librarías, e que así poden ser máis accesibles para o público investigador, mais tamén para calquera persoa interesada no tema. Reúne as distintas perspectivas que marcaron un dos fenómenos demográficos máis importantes dos últimos séculos en Galicia a través de obras que abranguen tanto ensaios como literatura de ficción ou biografías, entre outros xéneros, escritos entre principios do século XX e os anos 60, aproximadamente. Cada un dos volumes está prologado por un especialista contemporáneo na materia, como Ramón Villares, Pilar Cagiao ou Raúl Soutelo, entre outros.

Arquivo da Emigración Galega
O Arquivo da Emigración Galega (AEG) é un centro que desenvolve proxectos de investigación que intentan aproximarse ao fenómeno migratorio desde os máis diversos enfoques, cun carácter netamente interdisciplinar. Entre as súas áreas de traballo está a difusión de estudos sobre o fenómeno migratorio, a través de publicacións de obras de interese cultural e científico. Está dirixido por Xosé Manoel Núñez Seixas e conta entre os seus membros con Pilar Cagiao, Anxo Lugilde, Antía Perez ou Luís Domínguez.

Descarga da publicación
A publicación está dispoñíble baixo libre descarga gratuíta no web do Consello da Cultura Galega.