Na reunión estaban presentes João Ima-Panzo, diretor de Ação Cultural e Língua Portuguesa; o secretario Geral da UCLA, Vítor Ramallo e Rui Lourido, coordinador da Comissão Temática para a Promoção e Difusão da Língua Portuguesa da CPLP, pola banda portuguesa. Por parte do CCG participaron, alén da presidenta, Rebeca Blanco-Rotea, membro da comisión executiva; Marcelino Fernández, xerente da institución e Emilia García López, responsable de Acción Exterior.
A CPLP
A Comunidade dos Países de Língua Portuguesa é un foro multilateral creado en 1996 e orientado á cooperación entre os seus membros. Nela participan todos os Estados que teñen a lingua portuguesa como oficial e moitas outras entidades vinculadas ao ámbito da lusofonía e con intereses estratéxicos, económicos, sociais ou culturais compartidos.
O status de observador consultivo que ten o CCG supón que Galicia pode estar presente nas xuntanzas temáticas da CPLP, intercambiar información dentro desa rede de Estados e entidades internacionais e servir de ligazón permanente entre a CPLP e a cultura e a lingua galegas. O Consello da Cultura Galega foi aceptado como observador consultivo da CPLP no ano 2016.