O programa abre coa proxección da película Nación, de Margarida Ledo, un relato combativo e poético dunha loita inconclusa, a das mulleres da fábrica de cerámica de Pontesa. Canda ela a realizadora portuguesa presentará a súa curtametraxe Mulheres em quarentena que explora a relación de dúas mulleres - en Lisboa e en Brasília- que viven en fillos en casa por mor da COVID-19. As dúas realizadoras participarán nun debate co público que tamén contará coa presenza do diretor da Rede Casas do Conhecimento da UMinho, José Gabriel Andrade, e a realizadora galega Sara Traba.

O xoves proxectarase a curta experimental Ganas, de Maria da Fonseca e Rafaela Gomes, estudantes de Ciências da Comunicação da UMinho, e documental de Carlos Eduardo Viana titulado Das arquitecturas tradicionais. No debate posterior participarán, alén dos tres directores, o arquitecto Fernando Cerqueira e as arqueólogas Rebeca Blanco-Rotea e Fernanda Magalhães.

O ciclo remata o sábado 16 coa premiada longametraxe de Alfonso Zarauza, Ons, que entretexe un relato topográfico que explora os vínculos que existen entre as emocións e os lugares que habitamos. Completa o programa Lume na auga, de Ana Lois, unha viaxe interactiva pola Idade do Ferro no santuario galego de Augas Santas. Na tertulia posterior participa a historiadora Alexandra Esteves e a linguista Noemí Basanta.

Alén das proxeccións, o programa compleméntase coa exposición "ONS SOA", de Paula Ballesteros.

Edicións anteriores
Esta proposta arrincou en Braga en maio de 2018, cun programa centrado no cinema galego e a fronteira; un ano máis tarde tivo lugar a segunda edición. Desta volta foi en Vigo e estaba focalizado na situación da muller e a relación coa sociedade.

O programa é o resultado da colaboración institucional entre o Consello da Cultura Galega; a Universidade do Minho a través da Vice-Reitoria da Cultura e Sociedade; o Centro de Estudos Galegos (CEG); o Laboratório de Paisagens, Património e Território (Lab2PT); e o Centro de Estudos de Comunicação e Sociedade (CECS); o Município dos Arcos de Valdevez; o Museo do Pobo Galego e à Comissão Temática de Promoção e Difusão da Língua Portuguesa dos Observadores Consultivos da CPLP.