A terceira entrega de Sextina pon o foco nos Materiais dos II Encontros Galegos de Feministas Lesbianas, 28 e 29 de marzo 1987. Trátase dunha compilación dos materiais elaborados polas Comisións de Lesbianas das Asociacións Galegas da Muller de Santiago de Compostela e Ferrol e da Asamblea de Mulleres de A Coruña para estes encontros. Tiveron lugar en diferentes espazos universitarios da cidade de Santiago de Compostela no mes de marzo de 1987 e comprenden materiais publicitarios, os referidos á repercusión en prensa desta actividade e un total de tres textos mecanoscritos que se corresponden cos debates programados para a sesión da mañá. Este material aborda a necesidade de cuestionar a norma heterosexual dentro do movemento feminista, o gueto como espazo marxinal e a desinformación e deformación existente en torno á idea de lesbiana e lesbianismo.

Trátase de documentación relevante para a memoria dos movementos feminista e LGTBIQ+ en Galicia e para o coñecemento dos debates, reflexións, revisións e críticas máis destacados na segunda metade da década de oitenta do século XX en Galicia.

Sextina
Sextina é un proxecto do Centro de Documentación en Igualdade e Feminismo (CDIF) que semestralmente visibiliza folletos e documentos dos fondos do CDIF considerados rarezas ou pouco coñecidos debido á súa antigüidade, tipoloxía, forma de produción, procedencia ou xeito de difusión.
A primeira entrega, que se fixo pública en novembro de 2020, puxo na rede “A mulher hoje” ste documento en formato tríptico, é considerado un dos primeiros sobre educación non sexista publicados en Galicia. Trátase dunha guía de apoio ao proceso de ensino-aprendizaxe dirixido ao profesorado. Ten o obxectivo de fomentar unha conciencia crítica perante as desigualdades e desequilibrios entre os sexos a través da análise das discriminacións das mulleres en todos os ámbitos de relacións sociais. Inclúe recomendacións de actividades e medios para desenvolvelas.