Na súa entrada destácanse aspectos biográficos como que adoitaba dicir que era un “regalo adiado de Deus” xa que naceu mañá do 7 de xaneiro de 1913. Marcado polos estudos cos frades laurentinos e pola súa amizade con Álvaro Cunqueiro, comeza a estudar Dereito en Madrid. Foi alí onde, da man da lectura do texto de Risco, Teoría do nacionalismo galego, se forxou o seu compromiso político. Acabou a carreira en Santiago, e inicia uns anos marcados por unha actividade constante tanto no ámbito político como no cultural que se estenderon ata a súa morte.
Na biografía conta avatares da súa vida destacados como o episodio que se produciu en 1936 cando salvou a vida ao vestir o uniforme das tropas franquistas. Destaca tamén que foi depurado e inhabilitado que o obrigou a instalar a súa residencia en Vigo, cidade na que desenvolveu a maior parte da súa carreira profesional e vital posterior.
O seu casamento, o seu papel na constitución do Día das Letras Galegas, na segunda etapa de Grial, na coordinación dos programas Galicia desde Londres emitidos semanalmente en galego pola BBC, así como o seu vínculo cos proxectos e institucións culturais de Galicia, están explicados na súa biografía. Ademais, a entrada compleméntase con abondoso material que axuda a contextualizar e a comprender mellor a relevancia da súa figura con videos, audios, materiais, epístolas e publicacións.
Álbum de Galicia
En xaneiro de 2020 o Consello da Cultura Galega presentou o Álbum de Galicia, unha colección dixital de biografías de persoas que destacaron en moi diversos ámbitos: desde a sociedade, a ciencia, a cultura ou a empresa. A idea é dar visibilidade e perspectiva de conxunto ás numerosas mulleres e homes, xa finados, que contribuíron de maneira significativa á sociedade galega ao longo da súa Historia. En moitos casos, seguen a ser grandes descoñecidos para o público de todas as idades, de dentro e de fóra do país.
As biografías do Álbum de Galicia están enriquecidas con material documental, referencias bibliográficas e contidos multimedia que permiten coñecer a obra das persoas divulgadas, pero tamén a produción intelectual existente sobre elas. Textos e materiais están producidos por expertos e son unha fonte rigorosa para acceder á vida e obra destes persoeiros. Ademais, o Álbum de Galicia permite explorar a presenza das persoas biografadas nos fondos documentais dixitalizados do Consello da Cultura Galega. O Álbum de Galicia é, xa que logo, o punto de acceso que ofrece a entidade para coñecer toda a súa produción divulgativa e investigadora ao redor de cada unha das figuras.
O Álbum de Galicia é o resultado da unificación das coleccións biográficas temáticas do CCG, que desde o ano 2005 teñen publicado álbums ao redor da muller, a ciencia ou a emigración, entre outros.